佘詩曼唔憂嫁

「視后」鄧萃雯與「親生女」佘詩曼即使在電視城呼風喚雨，但感情生活卻交白卷。活在沒有男人的天空下，花開兩朵，雯女與阿佘各表一支。鐵血九姑娘鬧得臭男人狗血淋頭，原來雯女渴望被愛；昭陽三公主刁蠻任性，原來阿佘靜待愛情。或許這是女主角的諷刺！

我看雯女鬥毛姐

「傳媒將焦點落晒喺我同雯女身上，對其他候選人唔公平，唔可以抹殺其他人嘅努力，因為每個人都花咗好多心思去演。其實我睇好毛姐（毛舜筠），有人話佢演得浮誇，但我認為處境劇咁演冇問題，未入行前已睇佢演戲，好欣賞佢嗰份喜劇感。」

經歷摧心折骨的風霜，轉眼間佘詩曼已年逾30，視后攞過，錢也賺很多，縱使緋聞男友一大籮，陳浩民、鄭嘉穎、陳豪等名字車輪轉，奈何至今仍未找到真愛，躋身「黃金剩女」之列。長期在內地拍劇的她對「剩女」一詞全無概念，得知是指30以上雲英未嫁的女人後，即笑說：「個名幾靚！唔覺貶低女性！」在劇集中飾演刁蠻公主，甘願為愛情放棄所有；現實中阿佘卻為事業放棄愛情：「有得必有失，既然將時間畀晒工作，分配喺家庭同愛情嘅時間相對少咗！雖然成日想放假，但原來連續拍咗140集劇，遲啲仲開《法證先鋒III》拍夠170集先可以抖。」

祖母催婚萌退意

畢竟已達適婚之齡，阿佘婆婆擔心孫女嫁不出，不下數次催婚，讓她萌生退出娛圈的念頭：「媽咪冇逼我，但婆婆成日叫我唔好做快啲嫁，我問婆婆：『唔做，做咩？』佢話做乜都好。我有認真諗過（退出），但我真係鍾意演戲，好難放棄！惟有隨緣，我唔怕等，等待佢嘅出現！我等得o架！」拍拖對阿佘來說是奢侈品，有時間她寧願瞓覺：「我信緣分天注定，但依家忙到冇時間識人同結婚，即使有人追都冇機會應約，連瞓喺床嘅時間都唔多！」過去一年不停拍劇，令阿佘身心疲憊：「一次過拍咗《天與地》、《公主嫁到》、《審死官》、《花花世界花家姐》同《帶刀女捕快》6部劇，喺咁短時間演繹6個角色，精神上未停過，身心都好攰。」

讚法拉可塑性高

今年阿佘失落視后寶座，但其演技早受認同，奪「我最喜愛電視女角色」實力毋庸置疑。她自爆多年來靠「偷師」鑽研演技：「我冇正式跟老師學演戲，但會從不同對手身上觀摩、學習，我講嘅唔一定係男主角，好似小紅姐、日華哥等前輩，仲有撈家（羅嘉良）、郭晉安都各有唔同方法演戲，記得拍《七姊妹》，我有一段好長嘅對白，同時要夾雜好多動作，撈家見我又驚又忟，即教我丟晒所有嘢，將自己融入角色，唔好畀對白駕馭自己，令我一生受用。」阿佘穩坐TVB一線花旦地位，對於一班後起之秀，她特別睇好陳法拉：「法拉、鍾嘉欣同楊怡幾好，雖然佢哋觀眾緣唔錯，但如果要揀，我覺得法拉可塑性好高，佢演《公主》同《義海》兩類唔同角色都處理得好，欣賞佢。」

後記:孝順乖孫冧爆家人

阿佘專程返港出席台慶頒獎禮，僅留兩、三天已接受多個訪問，倦透的她仍撐到底，出名孝順女的她，拍照當日婆婆不停致電乖孫，穿上五吋高踭鞋加拖尾長裙的阿佘要來回接電話，語調溫柔地說：「得嘞！我會返嚟！聽晚我返嚟陪你食飯！」掛線後，阿佘面帶笑容說：「婆婆96歲，佢有時打完嚟又唔記得，佢真係好錫我！」