李嘉欣胡定欣好色揀
女星經常出席不同晚宴,一套適合的晚裝至為重要,要性感搶鏡之餘又不失貴氣,並不容易,稍有差池隨時出事!大美人李嘉欣雖然身懷六甲,但穿上特別剪裁及顏色晚裝後既能遮肚又大方,上位「姐仔」胡定欣利用沉色襯托膚色,同樣貴氣。
李嘉欣剪裁配合
N評:藍色晚裝夠特別,配上合適剪裁,畀人一種舒服自然嘅感覺。雖然腹大便便,但獨特嘅藍色成功將觀眾嘅注意力移開,不愧係美人。
評分:8分
梁靖琪潮味十足
N評:平常人睇呢套晚裝可能會覺得奇怪,但其實當中蘊含咗唔少潮流元素,我覺得套衫感覺好好玩同好開心,好適合佢呢類爽朗型少女。
評分:8分
Janice Man設計累贅
N評:呢套衫有唔少人着過,但就完全唔啱佢,設計比較累贅,着喺佢身上顯得身形細粒又單薄,腰位又太長,好似小朋友着咗大人衫。
評分:5分
陳法拉稍欠新意
N評:呢套晚裝非常穩陣,點着都好難錯,但係着喺法拉身上就略嫌冇乜新意,其實佢又靚又有身材,絕對可以多作大膽嘗試。
評分:7分
胡定欣恰到好處
N評:晚裝用料特別,細節嘅布料好靚,性感大方。雖然顏色比較沉,但襯上佢嘅健康膚色顯得非常得體,整體恰到好處。
評分:8分
呂慧儀款式太老
N評:我覺得套衫太刻意露肉,款式似足外國上年紀女士着嘅晚裝,表現唔到呂慧儀嘅驕人身段之餘,顏色亦唔襯佢,令人覺得佢肥。
評分:4分
Jocelyn古靈精怪
N評:整套晚裝只能用古靈精怪嚟形容,一啲都唔靚,主題唔明確唔知想表達咩訊息,而且中西式難分,十足動漫節着Cosplay。
評分:3分
高海寧似平價貨
N評:呢套晚裝好似平價婚紗店賣嘅新娘晚裝,俗不可耐!縱然有性感剪裁,但顏色低俗「娘」爆,畀呢套衫佢嗰個人真係靠害。
評分:1分
Profile
著名時裝設計師兼形象指導張學潤(Nelson),在娛樂圈打滾近二十年,見盡女星扮靚百態,對時裝審美眼光獨到,評衫作風敢言大膽,行內人稱他為「時裝判官」。
李嘉欣
梁靖琪
Janice Man
陳法拉
胡定欣
呂慧儀
Jocelyn
高海寧