陳靜粉絲「曆」險 誘人偷香

新一代「咪神」高海寧身材出眾，但面對「富豪新貴」陳靜（DaDa）仍要甘拜下風。DaDa自爆有粉絲偷其性感年曆，雖是違法行為，但她不禁笑言證明其性感有回報！

高海寧與DaDa昨日換上賽車女郎服飾出席《PS3皇東車王挑戰賽》活動，DaDa露出小蠻腰，性感程度先勝一仗，但玩Game「鬥車」時則由高海寧勝出，DaDa則淪為「地獄車神」。

談到衣着比高海寧性感，DaDa說：「我不嬲形象都性感啲，遲啲公司影聖誕相，都會以性感為主，希望畀到多啲驚喜大家。」她自爆在便利店遭人「偷窺」：「有個警察朋友話最近有幾宗案件，有人喺便利店偷我本年曆。（名副其實引人犯罪？）都唔明點解要偷唔買？不過都覺得自己努力有回報，起碼有人想睇我本年曆。（平日出街驚唔驚？）平時我打扮好密實，唔化妝又戴大眼鏡，成個男仔咁，冇乜人認出。」

匿名來電響不停

DaDa又不諱言想成為新一代性感女神：「想o架！希望可以做到，都有心理壓力，但會喺人前歡笑，唔開心就留番喺屋企。」問到是否吸引到更多富豪邀約？她笑說：「暫時未，不過呢排接到好多不知名來電，遲啲要改電話號碼。」至於高海寧亦大讚DaDa身材好，但她認為各有各美，她則勝在夠高：「我高過佢啲啲。（你係港姐高貴啲？）咁又唔係，個個女仔都高貴！」