娥姐作動喪叫街坊係咁笑
黃宗澤、王祖藍與商天娥等，前晚到彩雲邨街市拍攝電影《我愛香港》，吸引不少街坊圍觀。娥姐母性大發，不時扮鬼臉逗小朋友玩。劇情講述眾人冒雨送「大肚婆」娥姐入醫院，志偉親身到場監督。「作動」的娥姐上車時不停「喪叫」，七情上面勁肉緊，每當叫到「劏雞咁聲」時，街坊即笑爆嘴，更有人拍掌打氣！由於劇組多次開強力水炮灑水營造落雨，但未及向街坊示意，不少人避「雨」時雞飛狗走。
每拍畢一個鏡頭後，眾藝員被安排到屋邨一角休息。雖然有布隔開，但不少Fans仍企上圍欄影偶像，大型貨車亦經常從旁駛過，認真危險！由於黃宗澤與祖藍分別飾演主角梁家輝及曾志偉的少年時代，故志偉對兩人極之重視，休息時即捉實密斟。
扮大肚婆的娥姐邊喪叫邊送院，令圍觀的街坊笑爆嘴。
黃宗澤（右）與王祖藍試位時十分認真。