阿嬌新碟賣斷市偷渡返港慶功
鍾欣桐（阿嬌）為谷單飛推出的EP，向內地劇組請假一周。前晚阿嬌漏夜上機準備飛無錫開工時，有送機Fans「投訴」唱片舖冇貨，她即致電唱片公司查問，原來新碟賣斷市，衝破金唱片成績，令她十分驚喜！
昨日阿嬌接受電話訪問時，難掩興奮之情：「我開心到喺飛機上拍手掌！其實最感激內地劇組，多得佢哋遷就我，畀我返嚟香港宣傳，所以到無錫就要『萬歲』請劇組飲嘢慶功。因為個劇要拍跨年，預計拍到農曆新年，所以我密謀『偷渡』返港，同Fans搞迷你P慶功。」新劇雖明年才煞科，但阿嬌坦言聖誕節早已接了多個商演，袋近七位數字酬勞過肥年，但因檔期爆滿，只好白白送走近百萬元騷錢。