劉嘉玲動口不動手單打子丹

劉嘉玲為新片《最強囍事》忙到天昏地暗，直踩20小時仍沒有休息，矛頭直指因甄子丹「疊期」要趕拍他的戲份所致！兩人昨日正面交鋒，嘉玲更毫不留情地向「宇宙最強」正面單打！

劉嘉玲、甄子丹、古天樂、李曼筠、林司敏、汪圓圓和內地女星閻妮，昨日出席電影天馬電影賀歲電影的《最強囍事》記者會，張栢芝則因病缺席。該片為趕及賀歲檔上映，各演員每天趕緊拍攝，劉嘉玲坦言前天直踩20小時，矛頭直指片約不斷的甄子丹：「我前日都反映咗好耐，我唔可以咁捱。我頂到，但怕個效果拍得唔好。唔夠瞓、缺氧，好在對白笑餐飽！」

子丹透露事前已得知通告如此緊迫，嘉玲即插嘴：「我唔知喎！你又唔通知我？」子丹則說：「你畀黃百鳴搵笨！」問到是否因甄子丹孭多部電影在身，需經常離劇組所致，嘉玲終按捺不住說：「應該係喇！一定係趕佢，忙佢個期，我唔係好忙o架咋！（叫佢請食補品？）佢依家有咩代言呀？我唔係好補o架！」

促計加班錢

在旁的子丹一臉尷尬，即扯開話題：「講番正題啦！其實我啲期冇疊住，只係一部接住一部，今年都係得三部，未計聽日開嗰部。」嘉玲即驚訝地說：「吓？又有？咪就係咁囉！真係要計番加班錢。」子丹見愈講愈亂，即賣口乖讚嘉玲：「其實嘉玲姐好戲、好玩、又靚又後生，好難得咁賞面接拍。」嘉玲則說：「記住寫出嚟呀！多謝你欽點我！」她又指子丹於片中《葉問》上身，變了另一個人，似未抽離電影角色：「佢可以拍《葉問》第三集。（你愛人拍緊啦！）我愛人嗰部係《一代宗師》，唔好搞錯。」至於嘉玲坦言在家亦有跟梁朝偉學詠春，子丹則說：「都好耐喇喎！有冇八年？」嘉玲則說：「冇八年都有五年，都唔知係咪搵笨！」

此外，汪圓圓不承認是姐夫甄子丹「買一送一」下，才有份拍攝《最》片，但承認姐夫圈中認識人多。