黃日華怒斥TVB強姦民意

黃日華因不滿新劇遭忽視而炮轟無綫，他昨晚繼續發炮，直指公司「強姦」民意，並揚言要杯葛台慶頒獎禮！

因台慶劇《刑警》在台慶「隱形」及未被邀請出席，主角黃日華（華哥）及苗僑偉（三哥）先後在微博發炮狂轟無綫！餘怒未消的華哥，昨晚繼續狂插無綫只捧「親生仔」：「唔好再用陰招『強姦』民意！（出席頒獎禮？）邊個稀罕佢啲獎！佢鍾意畀邊個就邊個！我唔想做畀人利用嘅棋子！」問到言論如此激烈，是否打算不再為無綫拍劇？他說：「到時再算，係兩回事，不如擔心《刑警》會唔會被腰斬啦！（唔擔心被秋後算帳咩？）唔畀我入電視城囉！」對於台慶監製衞世輝表示電話長開，演員能隨時找他反映意見，華哥更顯激動：「我電話夠長開，TVB又唔搵我？（何麗全都有補鑊？）關佢咩事！解釋咁多即係掩飾！」

至於與無綫仍有包薪合約的三哥，反應雖然較溫和，但同樣不接受高層的解釋，又認為無綫應主動聯絡：「我冇咩意見，多謝佢有回應囉！（出席頒獎禮？）到時先算，依家開緊工，唔好理我去唔去啦！」

宣萱慨嘆「預咗啦」

此外，同樣未獲邀出席台慶的《刑》劇女主角宣萱，似乎已看化：「預咗啦！一早同華哥提過，呢幾年係唔同咗，有啲嘢心照！」她又大讚華哥演技好，希望對方勿因此事「唔撈」：「如果佢唔做好可惜，不過唔受重視係幾冇癮！公司應該公平啲！」而《刑》劇另一女主角胡定欣則搞Gag緩和氣氛：「華哥用啲激進方法宣傳啫！最緊要觀眾鍾意個劇。」