「E Cup教主」鄧伊玲每當變幻時

九龍寨城滿載香港殖民地時代的點滴，當年年紀小小的o靚模「E Cup教主」鄧伊玲，看見大鐵錘擊落在鱗次櫛比的圍城上，就如欣賞煙花匯演。今天，伊玲重遊舊地，縱使圍城已變成公園，但以往的「早餐竇」冰室卻人面依舊，恍如隔世！

不知不覺，伊玲已搬離九龍城十年之久。93年，港英政府清拆寨城，這個昔日「三不管」的地方從此變成公園及住宅用地，每一個轉變均歷歷在目。伊玲今天重遊舊地，要去的地方多不勝數！第一站首選中民冰室，因為這家擁有45年歷史的「茶記」，正是伊玲當年早午祭「五臟廟」的地方：「小學到中學，我都喺九龍城讀書，當時我會早啲起身，第一時間唔係返學校，而係到冰室歎火腿通粉！」當然冰室今天還有火腿通，但為配合市場需要，已增設炒通粉及公仔麵等特色食物，回想當年年紀小小，媽媽拖着她的小手到冰室，如今每一幕頓現伊玲腦海中：「當年媽咪日日都會比我更加早起身，然後帶我食早餐同返學，今日返番嚟呢個地方，布置同老闆依然冇變，真係好大感觸！」

圍牆如煙花般散落

冰室與母校只有一個公園之隔，伊玲順道返母校看個究竟，雖然當年教導她的老師大多已退休，但看着學弟妹純真的笑面，不禁令她感懷當下世途險惡。伊玲走過寨城公園，又在牙科診所拍照留念，憶起紙皮箱那隻流浪貓，九龍城的種種記憶，依然歷久常新：「嗰時見到寨城清拆，雖然好細個，不過大鐵錘鑿落圍城嘅聲音依然縈繞耳邊，當時真係當煙花咁睇；不過依家諗番，原來社會一直變緊，舊去新來，究竟係好事定壞事呢？社會真係變得太快喇！」