名模劉雯高人一等透現美態

女星想性感，除了谷胸外，透視誘惑亦是不二法門！不過玩透視都要講技巧，襯得好當然能流露不經意的美感，但亦要小心弄巧反拙，即如Ana R.般着出禍，屆時不只性感欠奉，分分鐘着到老幾歲，弄出個師奶裝咪話唔嚇壞人！

差啲啲：Mandy Lieu 老氣縱橫

評分：★★★★★

評語:條裙老氣得滯，着到佢成熟咗，隻色太陰沉冇生氣，但佢個樣太後生，條裙太老唔啱佢，駕馭唔到，冇美感，呢啲款如果老啲嘅人着會好睇啲！

鍾嘉欣 上下失守

評分：★★★★★

評語:條裙本身好型，但佢着唔到個感覺，對鞋好笨重，如果配對過膝長Boot感覺靚啲，同埋紮馬尾All Back頭會好好多，條裙真係幾好，只係配件有問題。

超晒班：劉雯整體最潮

評分：★★★★★★★★★★

評語:好靚，有咁高咁瘦嘅Figure先着到，多一分脂肪都着唔到，好High-end Fashion，佢嘅黑色頭髮同件衫嘅黑色線條簡直係Perfect Match！

蔡卓妍紅黑潮人

評分：★★★★★★★★★

評語:紅襯黑襯出節日氣氛，Mix & Match得好有心機，一絲不苟，簡單若隱若現效果都幾靚，唔老積！啱佢年紀，再加埋上身衫個Shoulder Pad，透得嚟好潮！

劉丹優雅貴氣

評分：★★★★★★★★

評語:襯晒一套好靚，着到優雅貴氣感覺，呢件衫幾性感，隻血紅色好艷麗，其實呢隻色好蝦人着，以佢健康Tan Tan哋嘅膚色襯得都幾好！

楊采妮健康性感

評分：★★★★★★★★

評語:佢條裙簡單優雅，只透視上面，係健康嘅性感，本身條裙黑色可能會好悶，佢特登加對深紫色嘅絲襪，令成個Look好有Class，唔使刻意性感都着出性感美！

嚇死人：胡定欣比例失衡

評分：★★★★

評語:條褲太短，比例唔啱，配搭有問題，好明顯係刻意露長腿，感覺核突，如果加條短裙褲款會好好多，依家好似冇咗樣嘢咁，怪怪哋！

Ana R.配搭論盡

評分：★★★

評語:呢個襯法嘥咗佢個Figure，今次配搭好論盡，又唔靚，感覺唔Make Sense，唔加條透視裙成個感覺會唔同，起碼會順眼啲。

Profile

郭慶彬（Ricky Kwok）加入時裝界8年，從事廣告形象指導為主，曾為熊黛林及樂基兒等靚女模特兒設計形象。而他亦在銅鑼灣開時裝店，售賣日本及英倫服裝。