華哥三哥台慶「隱形」轟無綫Very Bad

苗僑偉（三哥）及黃日華（華哥）不滿台慶劇《刑警》在無綫43周年台慶「冇影」，深感被忽視的他們在微博炮擊TVB「totally very bad」，三哥更不諱言：「究竟發生咩事？係咪得罪咗人？」

前晚無綫台慶雲集一眾藝員落力表演，司儀陳百祥在序幕中更穿梭多套叫好叫座的劇集作介紹，包括《公主嫁到》、《義海豪情》、《讀心神探》、《談情說案》甚至較早期的《情越雙白線》等，唯獨台慶劇《刑警》完全「冇影」，不但隻字不提演員名字，主角「Mad Sir」三哥及「Stone Sir」華哥更未獲邀出席。二人昨日分別微博上炮擊無綫此舉欠尊重，自認憤怒及噴火的華哥說：「有人話：『叫好叫座的劇集不獲重視、缺宣傳（靠自己演員去做）、屢遭打壓……我黃日華好想問是哪間公司？』」三哥即回覆：「非公司……是人為？」華哥隨即爆粗狂炳：「totally very bad，我頂！」

監製反寸唔蒲頭

三哥昨日直言公司不重視《刑》劇：「之前已經少宣傳，依家又冇獲邀請出席台慶，究竟發生咩事？係咪得罪咗人？」華哥則說：「好多影迷都問我點解會咁，我都想知點解，唔知公司咩政策囉！（向公司了解？）唔使喇！叫公司喺電視度解釋啦！」他又不諱言無綫並沒邀請他倆出席台慶：「一個都冇！個劇冇提都算，公司都應該係咁意問吓我哋出唔出吖！」而《刑》劇監製唐基明亦直斥不公平：「公司應該不分大、細去照顧演員，惟有講句真金不怕洪爐火，個劇口碑好咪得囉！」

法拉成功「面聖」

至於台慶監製衞世輝則不以為然的說：「台慶唔係宣傳劇集嘅渠道，《刑》劇係紀律部隊劇，唔可以攞嚟玩！其實《天天天晴》都冇請！其實好多演員冇演出都自動上嚟玩大抽獎，唔知點解佢哋（三哥、華哥）唔嚟！我個電話長開，演員如果有咩不滿點解唔打嚟講？」

此外，「帶案復職」的陳志雲完成台慶後與高層及六叔影大合照，並與證人黎耀祥擁抱及詳談，祥仔昨日出席活動時說：「合理場合打個招呼啫！我有問佢有冇睇《義海豪情》，佢話有仲話我做得好！（陳生復工，你視帝勝算高？）陳生都鍾意陳豪，好多政治因素嘅，要睇埋結局反應！」他笑言去年已拿過視帝，故不介意「豪畀」兄弟陳豪。而六叔離開時由六嬸方逸華護航，但陳法拉竟能成功埋身，並與六叔合照。