樂易玲叫好 李寶安冇影 何麗全：台慶內容要匯報

對於陳志雲復工，有人歡喜有人愁，無綫製作資源部總監樂易玲說：「我一早已經知道，其實比預期遲咗（指志雲復工），呢件係一件好事，台慶前再有一件喜事！（志雲復工暫時唔需要管經理人部門？）今日開會梁乃鵬都有講，暫時有關藝員嘅事直接向方小姐匯報，至於藝員部工作一切如常，我會努力做好。」至於陳志雲會否參與頒獎禮評審？樂易玲自言是獲邀請擔任評審之一，未收到通知陳志雲會否參與。

對於直屬上司志雲復職，無綫製作部總監何麗全坦言開心：「梗係開心，有咁熟電視嘅人處理職務，佢係我哋直屬上司，有佢喺度方便啲。」何麗全又指昨晨已於電視廣播城跟志雲開會，會議由無綫副行政主席梁乃鵬主持：「始終隔咗一段時間，佢（志雲）都要睇番過去工作情況。（官司未完？）呢啲公司安排囉！」問到志雲會否再做幕前工作，例如擔任台慶司儀，他說：「台慶啲嘢定咗，佢唔會參與，至於節目內容嘅嘢我要搵監製同佢匯報。」而志雲昨晚約七時折返電視城，而李寶安的座駕則駛出，但車內未見其蹤影。

另外，問到市場及營業部業務拓展主管陳永孫何時復職？外事部副總監曾醒明說：「陳志雲係高級管理階級，所以會先行處理，至於陳永孫，之後再作考慮。」