小春古惑搶新娘罰飲洗腳水

恭喜恭喜！陳小春昨日補辦婚禮，獲「古惑仔」兄弟團助陣爆門搶新娘。他還自爆玩新娘時被罰飲洗腳水，但未有介意，晚上廣邀親朋飲喜酒！

陳小春與應采兒昨日假迪士尼酒店補辦婚禮，鄭伊健、謝天華、朱永棠及林曉峰等《古惑仔》核心人物組成兄弟團，齊賀好友新婚。在小春要求下，兄弟團穿上西裝加短褲出席，儼如日本漫畫主角柯南，造型搞笑。張耀揚與杜汶澤亦有出席，恍如舉行「古惑仔派對」。

婚禮儀式後，一對新人合卺交杯，然後切蛋糕及簽字。小春與新娘子咀足九秒，所有賓客齊齊起哄。事後新郎接受訪問，小春表示前晚緊張到睡不着：「今朝接新娘，老婆形容班兄弟好似侏羅紀，兄弟爆門入內，真係好似『古惑仔』，姊妹連耳環都被扯甩！今朝有個遊戲要兄弟用腳喺冰桶夾麻雀，我係唔夾，留番畀阿澤夾，但最後要我飲番洗腳水都OK，因為兄弟嘅水『血濃於水』。」談到補辦婚禮，小春說：「因為老竇坐輪椅，所以冇去到美國，今日係為佢而搞！」

志偉開定房劈酒

晚上，小春在酒店擺囍酒，邀得圈中多位好友出席，包括陳豪、蒙嘉慧、田蕊妮、梁家輝、洪天明、樂基兒及劉偉強等，恍如圈中明星聚會，如田蕊妮與梁家輝合照，她笑指負責來飲酒︰「我今晚負責嚟飲，老公負責觀禮。（送咩畀小春？）佢咁貪錢，送錢畀佢。」郭富城與御用排舞師Sunny Wong出席，他表示與小春相識多年，會折現作賀禮︰「原本要去北京做嘢，但咁啱延期，可以嚟到好開心。」他亦直言不會上台獻唱，因今日衣着較低調。

至於曾志偉約九時才到達，他表示剛收工趕過來︰「我有間房喺度，唔驚今晚醉，但驚啲人知我有間房，第二日瞓醒會有好多人醉喺度。（人情？）人到就夠啦！」