小方Stephy關係升呢同房度春宵

方力申與鄧麗欣被本報踢爆到馬爾代夫「蜜月」旅行後，昨日攞正「情侶牌」出席活動，春風滿面，他們口徑一致默認親密關係，更沒有否認同房度春宵！

近期娛樂圈潮興公開戀情，向來被視為一對的方力申與鄧麗欣（Stephy），昨日終於默認戀情！二人早前剛以情侶姿態接拍內地劇後，前日又被本報踢爆到馬爾代夫旅行過二人世界，惹起秘婚及度蜜月疑雲！剛返港，二人昨日繼續以情侶檔出席「百福婆婆」活動，雖然Stephy身穿Plotz灰色衫出現，但人逢喜事特別紅光滿面，接受訪問時，更獲小方全程護航！

自行更正非單身

問到是否到馬爾代夫結婚及蜜月？小方否認：「冇結婚、冇蜜月，我仲係單身……（急忙自行更正）唔係，總之冇結婚啦！」Stephy則說：「結婚一定畀傳媒查到！」問到可有結婚衝動？自認「仲細」的Stephy說尚未到適婚年齡，小方不禁衝口而出更正：「你仲18、22（歲）咩？不過我事業啱啱起步，都唔心急結婚！」

雖然被窒到應，但被問到是否和小方拍拖時？Stephy仍大方地說：「我冇諗過介意或逃避啲乜，成個旅程好正常喺機場往返，我哋好大方！」她坦言預了被港旅客發現，如被拍照也沒所謂。至於小方則以「好怕醜」為由要低調談情，不過他已「畫公仔畫出腸」：「影到乜就乜，我做人頂天立地，冇嘢唔見得光，我唔會講大話，只係唔講啫！」他們異口同聲表示不想詳細交代相戀經過，只呻笨說之前拍劇只收「打包友情價」，如事先張揚「情侶檔」，或昨日可收得更高的價錢。對於每次拍拖外遊都穿煲？小方無奈地說：「唔好提以前啲衰嘢啦！」

唔Mind被稱「女友」

由於小方要上台，獨自面對傳媒的Stephy被問到是否與小方同房？她不置可否說：「大家都有共識，唔想講太多Details嘢啦！（小方係咪你男友？）我係同方力申去旅行！（二人世界？）係呀！」她沒直認小方是男友，但又說不介意當上「女友」之名：「咁寫唔會告你哋（記者），我哋又唔係咁衰！」

另外，日前於微博踢爆二人同遊馬爾代夫的網民Carol_K，前晚上載一張疑旅客準備入閘的照片，當中一對以全黑色打扮的情侶，估計是小方與Stephy，Carol_K表示不會再在網上透露目擊過程。