鄧紫棋創作靈感全靠拍拖

當年G.E.M.（鄧紫棋）未夠十八歲已入行做歌手，簽約時竟問老闆「唱歌可唔可以拍拖同結婚o架？」當老闆表示可以時，令她甚為興奮，她坦言很享受拍拖，創作靈感也像泉湧。

剛推出了新專輯《My Secret》的G.E.M.，近期與台灣歌手林宥嘉的戀情撲朔迷離，她堅持不會再多說，問到是否唱片公司老闆施壓不准她談戀愛？G.E.M.笑說：「唔係，佢冇唔畀，佢好好，我最記得我入行時同老闆簽約，我仲問佢做歌手可唔可以拍拖，佢好爽快答我『得』，我話結婚呢？佢都話『得』，佢話唔通綁住我咩！當時聽到老闆咁講，我就知呢個老闆好開通呢！」老闆從不給予壓力，亦給她自由度，所以，她都會懂得分寸，不會受情緒波動而影響工作。

甩拖冇失控

當日與圈外男友分手，未知可有影響新碟錄音工作？G.E.M.說：「大家真係和平下分手，明白兩個人之間嘅問題都醞釀咗好耐，唔係突然爆出嚟，所以，情緒都冇乜好大失控，雖然當時係做緊碟，但都冇影響到。」

不過，G.E.M.坦言很享受拍拖，因為拍拖讓人心情特別好，發揮的正能量也特別多，心情愉快，創作靈感都似泉湧。她自爆《All About You》便是當年給圈外男友寫的情人節禮物，她笑說：「唔好次次都係我寫歌畀男友，希望將來有喜歡嘅男仔寫番畀我啦！」G.E.M.的要求，不知林宥嘉收唔收到呢？