何基佑拖未婚妻預演

無綫節目主持何基佑，明年與拍拖兩年多的女友Charis拉埋天窗，日前兩人到九龍塘一間教堂視察環境，順道預演婚禮，基佑表示屆時不會擺酒，盡量化繁為簡。

何基佑早前成功突擊求婚，將於明年4月迎娶同為基督徒女友Charis，還將求婚過程放上YouTube分享。日前基佑和Charis到九龍塘的伊甸園玻璃教堂視察環境，教堂內環境寧靜清幽，兩人不時攬到實，甜蜜陶醉，而Charis又用相機拍下教堂的環境及布置，並與「老公仔」玩自拍，認真煙韌。其後他們與教堂職員開會，相信是商討婚禮細節。

基佑受訪時表示，他們會在該教堂行禮：「明年4月舉行婚禮。（邊日？）暫時係清明節，因為貪佢係公眾假期。（擺酒？）唔會囉！根據過往出席朋友婚禮經驗，擺酒係好忙同好攰嘅事，所以都係簡單為主，以Cocktail形式舉行。」

幾年後生BB

基佑又謂自求婚後，因為忙於舞台劇、主持及出碟工作，到近日才有空閒處理婚事，他大讚玻璃教堂一流：「好好Feel，到時安排好友唱聖詩，亦會叫埋高皓正同周永恒幫手，同時將婚禮狀況現場直播畀喺外地嚟唔到嘅親友欣賞。」

問到婚後會否生兒育女？他說：「希望生一個啦！但都係三、五年後嘅事，我哋要享受拍拖二人世界。」