趙嘉懿追B女唔隆胸
已為人母的潮模趙嘉懿（Carrie），近日簽約新公司密密行騷，身為潮媽的她平日最愛為半歲大的兒子Marcus扮靚，其公司更想Carrie的兒子做B模，母子檔行騷拍廣告，Carrie說：「如果可以一齊兩母子拍廣告，我諗都幾得意幾開心，（覺得BB有表演欲？）都有o狄！雖然佢依家未識行，又未識講嘢，但佢成日做啲古靈精怪嘅表情，氹得成家人都好開心。囝囝又好鍾意照鏡，我哋讚佢靚仔，佢就會狂笑。」
Carrie笑言要兼顧家庭及事業：「其實我好細個已經成日幻想一個畫面，就係自己擁有一個幸福家庭，又可以做自己鍾意做嘅工作，依家兩樣都實現晒，我覺得好幸福。」問到可有考慮倣效莊思敏隆胸，她說：「我一定唔會，因為自問冇呢個勇氣，同埋女人做一次手術其實好傷o架！我仲想追多個BB女，所以要養好身體。（大胸有着數喎？）我不嬲都係走另類路線，咁多年嚟都有客戶搵我，證明我都有自己嘅市場啦！」
身為潮模，趙嘉懿擺甫士有型有格。
趙嘉懿抱着囝囝，幸福滿瀉。