林心如宅女恨拍拖靜待Mr.Right

台灣女星林心如甩拖多年，但對愛情仍未感恐懼，揚言敢愛敢恨，只欠Mr.Right出現。

久未在香港露面的林心如，早前來港宣傳新劇《三國》，劇中飾演孫尚香的她，為了解角色背景，事前做足準備工夫，除了操Fit體能外，還買下大堆書籍參考，無奈密麻麻的字令伊人產生倦意，久久未能成功閱讀一本，最後惟有靠睇碟惡補。

對於好友趙薇於年前的電影《赤壁》中同演孫尚香，更不乏打戲，心如不諱言當初也以為劇中會有多場打戲，但其實只得一場，令她大感意外，不過她萬料不到該場戲竟要花三個晚上才能完成：「角色講我好叻玩雙刀，但我好多時係臨場先學，最難係耍刀花，耍完之後兩隻手好酸，所以談情戲同打戲比我揀，我寧願談情！」

專注內地搵人仔

近年長駐內地的她，雖然收入豐厚，但感情卻苦無出路，心如自言很想拍拖，但至今亦未遇上心儀對象，問到是否因忙所致，她笑說：「唔係！要拍拖實抽到時間，不過呢個人未出現！平時都係對住演員同工作人員，全部唔係結咗婚就係有女朋友，依家大個咗又少出去玩，好多時留喺屋企，但都開心！」完成該劇宣傳後，心如便要籌備其處女製作的古裝劇《傾室皇妃》，該劇預計年底開拍，屆時她除了親身上陣擔演王妃外，還有意打友情牌廣邀好友參與：「之前有問過范冰冰同章子怡做製作人係咪好辛苦，有做晒功課，但成功咗就有好大滿足感，因為好似自己個BB咁。」