祥仔自比北丐 視帝有得爭

視帝大熱之一黎耀祥今年被無綫「親生仔」林峯及陳豪夾擊，衞冕機會存疑，但他昨日在台慶記者會上仍相當風騷，除了以「華山論劍」比喻今屆視帝之爭外，又取笑阮兆祥是「流TVB嘅尿」!

無綫昨日在電視城舉行43周年台慶記者會，公布頒獎禮各大獎項的入圍名單，但三大視帝熱門黎耀祥、陳豪及林峯中，只得祥仔現身撐場。雖然祥仔去年一償夙願榮膺視帝，但今年卻備受兩位「親生仔」林峯及陳豪夾擊，林峯日前更獲「六嬸」方逸華親筆題字鼓勵，風頭一時無兩！不過，祥仔昨日在會上仍風騷不已，似未為獎項擔心，當司儀朗讀「最佳男主角」的候選名單時，甫讀出「黎耀祥」三字已獲台下藝員歡呼支持。

寸阮兆祥「流TVB尿」

祥仔受訪時謙稱今年「冧莊」機會微：「今年唔係我啦！今年可謂四大門派，華山論劍咁！」他又逐一點評兩大勁敵：「林峯係偶像實力派，有氣勢又得觀眾歡心！（林峯有六嬸題字鼓勵喎！）呢樣當然重要啦，但都要各方面嘅平衡！陳豪做喜劇就為人接受；馬浚偉就係書生派代表！（陳豪同林峯都係流TVB嘅血喎！）我係北丐，屬於乞兒仔！（咁咪多人撐囉！）咁都要選過先知！」他又表示視后是鄧萃雯、佘詩曼及楊怡之爭，再問到有否「度定」領獎謝詞，他說：「今年唔係好敢度，有啲驚！（使唔使林峯捐啲TVB血畀你？）好鬼衰！我真係好鍾意佢，佢好親切。」其後，當記者問阮兆祥是否流着TVB的血時，祥仔即「潤多劑」：「你流TVB嘅尿！」阮兆祥笑說：「TVB唔係『流』嘅！」場面搞笑！

黃日華慨嘆「要知碇」

憑《刑警》提名視帝的黃日華，對於被指是視帝大熱，他卻似有弦外之音：「熱？發燒呀？（信心？）一向唔重視呢啲！作為藝人要清楚自己嘅形勢、位置、環境同實力！（即係咩環境？）心照啦！（林峯有六嬸撐？）所以大家咪要明白巿場需求同身份！」另外，問到是否希望在「獎門人」曾志偉手上奪得「最佳節目主持」？阿姐汪明荃說：「我哋有新意啲！（視后呢？）我哋呢啲梗唔會！」此外，網友昨日在討論區設立「心水視帝視后」投票，視帝暫時由林峯領先，祥仔屈居第二；視后則由雯女及阿佘叮噹馬頭，但以雯女稍稍領先。