李嘉欣親認佗仔影大肚裸照

李嘉欣昨日親口證實為許家懷有「慈姑椗」，對於外界對她的懷孕謠言四起，更詛咒其BB患唐氏綜合症，她都沒有動氣，更計劃拍大肚裸照。

已屆四十歲的李嘉欣，自宣布為許家添丁後，外界對她懷孕之「謎」謠言滿天飛，一時傳是以「體外養卵」才成功受孕，一時又傳她的BB患唐氏綜合症！目前懷胎達五個多月的嘉欣，昨日盛裝出席《MIKIMOTO》開幕活動，她懶理各種負面新聞，穿上Oscar de la Renta黃色Tube Dress，佩戴價值350萬元頸鏈，腳踏兩吋船踭鞋，嘉欣更首度親口證實為許家「佗仔」，將會是許家200億資產的承繼人，嘉欣更即場獲大會送贈共值12,000元的母子鏈！

曾想搵代母

因大肚令上圍明顯升級的嘉欣，接受訪問時獲經理人陳善之小心翼翼護駕，風騷的她親口證實懷男嬰，問到老爺奶奶是否特別開心，她說：「我冇特別去研究生仔定生女會開心啲，我只係知道佢哋開心。（會唔會有獎勵？）我哋屋企冇呢啲嘢！仔女都係自己骨肉，我冇呢啲諗法，我都係諗住生女嘅！（遲啲追女？）完成埋呢個工程先再講。」

對於有傳以「體外養卵」才成功懷孕，她未有正面回應：「其實由我懷孕到依家，已經計唔到上咗幾多個封面，最過分係咒我BB患唐氏綜合症，但我冇唔開心，冇影響心情，我好Enjoy我懷孕過程，所以唔想逐一回應各個封面，實在太多喇！（但依家流行人工受孕，生仔同生女可以揀性別？）暫時冇需要考慮呢個問題。（你個肚100%天然？）我成日想說服我先生搵代母，佢又唔肯，老公話有我使乜搵代母，我同佢講，其實都係我同你個結晶品，只係搵第二個母親去生，不過原來有啲人接受唔到，佢話有冇BB唔重要，全世界只係想同一個人生，嗰個人就係我。真係好感激，真係唔該晒。」

盼生兔BB

問到是否亨亨此番愛的宣言，令她打動生BB，她笑說：「唔係，我覺得佢係整蠱我囉！咁好帶挈！（唔生係想Keep住身形？）其實香港有啲Level係低少少，好似外國女星Sarah Jessica Parka都係咁樣啦！生咗對孖女。」問到目前BB多少個月，她故作神秘地說：「唔講喇！大喇！（趕新年收利是？）家族未出世都可以收利是。（虎定兔？）太多虎圍住我，我想兔。（有傳你話影大肚裸照激嬲奶奶？）我自己係有呢個打算，但唔會公開啲相。（咁係咪激嬲佢？）冇咁嘅事情，我做每件事都好支持我，我屋企冇任何爭議，工作排到12月。」嘉欣表示生仔是上帝的安排：「好多朋友年紀大，用好多方法生唔到，呢個係God Give！」

潮

李嘉欣身穿Oscar de la Renta的黃色Tube Dress作「大肚裙」，配襯2吋船跟鞋，明艷照人，佩戴價值350萬鑽飾 。