溫哥華(19)岑麗香爆冷摘冠

《2010國際中華小姐》昨晚順利誕生，經過一輪終極拉票戰後，由來自溫哥華的(19)岑麗香「爆冷」奪冠，來自吉隆坡的(7)陳美妤與賽前大熱多倫多代表(18)張慧雯分奪亞季，谷胸上陣的香港代表陳庭欣大熱倒灶，六強止步！

今屆《國際中華小姐》昨晚假天津環亞國際馬球會大酒店舉行，來自世界各地的24名佳麗施展渾身解數，以皮草、泳衣及水晶旗袍亮相。雖然賽事於酒店進行，當地氣溫只得幾度，但佳麗仍「大無畏」照穿性感三點式出場，睇頭十足。經過泳衣及問答環節，結果由來自溫哥華、芳齡25歲的(19)岑麗香摘下后冠，亞軍則是吉隆坡代表(7)陳美妤，擁有35吋上圍的多倫多代表(18)張慧雯只獲季軍，陳美妤兼奪「中華儷影小姐」。至於賽前已先拔頭籌獲選「友誼小姐」的(5)白鷺，在台上領獎時獲身旁的(4)林晨諭及香港代表(6)陳庭欣吻賀。

終極拉票贏條街

今屆華姐以新賽制選出三甲，比賽爭持激烈，大會先公布季軍，其餘兩位佳麗最後自我終極拉票定勝負，五票中有四票支持岑麗香。所有得獎佳麗將獲總值逾五百萬元的獎金獎品，打破歷年紀錄。香港代表陳庭欣雖然賽前大熱，全晚表現落力，「變身」環節時更穿上銀色閃石低V晚裝裙，罕有谷出「事業線」，可惜最後在六強止步！被指貌似上屆華姐冠軍苟芸慧的張慧雯，台上被問到可有信心奪冠，她避而不答：「好難答！比賽係另一回事，呢個係一個Show，希望大家Enjoy。」

出爐冠軍岑麗香在台上感動得眼泛淚光，她說：「以前好多人話我廣東話唔得，今年我好畀心機學習，今晚講出自己嘅心聲。我可以你哋都可以！」

亞軍唔夠Cute認輸

賽後，岑麗香返回後台接受訪問，她自言估不到會贏出：「多謝所有人，多謝支持我嘅人！（覺得自己贏乜？）I'm not sure，其實有冇獎唔重要，我係做好自己。我上年學廣東話學咗好耐，希望有進步，（打算入行？）未知，我啱啱先畢業，今晚媽咪都有嚟睇。（男友呢？）我冇男友！因為要比賽同讀書，所以之前都冇拍拖，唔想分心。」亞軍陳美妤被問未能奪冠有否失望，她說：「冇！入到12名已經好開心，依家仲有個『附屬品』已經好滿足，今次盡力而為。冠軍好叻又好靚，呢個係大家公認嘅，我唔夠佢Cute。」

至於落敗的陳庭欣大方表示沒有失望：「都係一場Show，我叫做完成咗成個Show 。（香港代表好少輸？）唔一定！證明TVB係公平嘅，入到六強已經好開心。（擔心點同公司交代？）唔會！係同自己交代，（覺得輸啲乜？）其他佳麗笑容好啲，我笑得唔係咁叻。」