G.E.M.盼擁個人品牌
今年19歲的G.E.M.（鄧紫棋）瞓身歌唱事業發展，鐵定明年3月進軍紅館，事業得意的她，愛情也如意，她曾默認與林宥嘉戀情，但堅持低調談戀愛，穿上代言的Skechers運動服及波鞋的她，有傳與林宥嘉在手上戴着情侶繩，問她可會穿情侶裝？G.E.M.說：「第一次拍拖時試過。（做咗藝人仲敢着？）我覺得冇問題，工作、拍拖係生活一部分，唔值得為一樣嘢而犧牲另一樣，我覺得最緊要兩人開心咪得囉！我唔介意人哋點睇。」
身材嬌小的她最愛高踭波鞋：「着咗冇咁矮，平時喺台度着咗高踭鞋，同其他歌手都仲差一截。」廣告商每逢有新款產品，都會送贈給她，連母親及妹妹都受惠。她希望將來擁有自己的品牌：「之前我演唱會出過啲紀念品，今次新碟又會送銀包，我對設計好有興趣，或者將來有機會設計吓自家嘅飾物、眼鏡、帽呢啲精緻物品。」
愛情事業兩得意的G.E.M.，明年三月在紅館開騷。
身材嬌小的G.E.M.，最愛穿高踭波鞋。
