Kary密斟續約紅館開騷

吳雨霏（Kary）與金牌大風合約將於明年六月屆滿，金牌近日落足嘴頭及開出紅館演唱會條件挽留，Kary將緊接側田於明年一月三十日踩上紅館舞台。

吳雨霏出道即獲公司力捧，曾與雷頌德弟弟組成樂隊Ping Pung，其後又以個人姿態出唱片，直至最近她再與樂隊Hardpack合作，形象及歌路百變的她，將於明年六月約滿金牌大風，據知，有多間國際唱片公司曾斟洽合作，金牌大風為了「肥水不流別人田」，近日多番與Kary傾續約，還落重本為她明年舉行處女紅館個唱。

證明有價值

金牌大風發言人強調，為Kary開騷與續約無關：「我哋一直有呢個計劃，兩年前Kary喺Star Hall開演唱會時已經幫佢入紙紅館，由於紅館檔期好密，只排到明年一月有位，當然Kary係有能力應付啦！」問到開出紅館騷是否挽留的第一步？他說：「開呢個騷唔關續約事。」

Kary在電話中承認有多間唱片公司接洽過她：「有其他唱片公司傾都好正常，依家只係初步咁傾，言之尚早，我同金牌仲有半年約。」抵死的Kary還笑說：「冇人搵代表自己冇價值，依家證明仲有得撈。（金牌幫你開紅館騷係挽留你嘅第一步？）合作有好多嘢去傾，紅館係其中一樣，總之我同金牌合作得好愉快。」