「非凡哥」住家好男人重親情

麥長青最近憑「非凡哥」一角再受觀眾熱捧，入行23年的他坦言不寄望該角為他帶來甚麼實際得益，只希望繼續做家中的好男人。

入行多年的麥長青（麥包）於《巾幗梟雄之義海豪情》中飾演「非凡哥」，不少觀眾讚奸到出汁，令人恨之入骨，微博上亦有不少圈中人讚賞其演出，但麥包坦言沒有因此而飄飄然，因入行多年，很多事已睇化：「咁多年所見所聞都睇到化晒，以前拍《茶是故鄉濃》，心諗都輪到我啩！好彩最後跌番落嚟，因為一個人太順利，唔識諗反而會變悲劇。我唔鍾意同人比較，自己開心就得，我又好滿足喎！」麥包十二歲由順德來港，小時候捱過不少苦頭，他說：「嗰陣每日食飯都係撈沙糖或者片糖，人哋問我豬油撈飯好唔好食，我唔知，因為我都未食過！九歲嗰陣都未知乜嘢係底褲，我只係知去廣州返工先有鞋着。」

感激太太背後支持

入行至今難得有人賞識，找他做生意及做巿場策劃工作，養妻活兒的日子總算捱得住。問到多年來於無綫工作是否盆滿缽滿？麥包說：「喺TVB咁多年都唔夠！我一個人就話可以豐儉由人，但去到養家就好多開支，真係要靠喺其他地方賺錢，單靠呢行養家真係唔得！以前唔夠使會同阿媽攞番轉頭，我同佢講過：『你一退休我就轉行，我嚟養家。』不過咁多年來，我都好多謝媽媽同太太好體諒我。」

麥包自言是一名大男人，只想太太照顧子女及打點家中一切，不想她出外工作，他說：「我好大男人，自己做到就做，除咗親情，冇嘢推得冧我！」