Joey母愛隨身

天后Joey在樂壇打滾逾10年，這些年來憑個人努力，由出道時的鄰家女孩，漸漸成為獨當一面的樂壇天后，雖然身家暴漲，但她仍努力工作，下月在紅館舉行第6次個唱！正所謂「財多身子弱」，近年她的聲帶一度出事，令她感到前所未有的困擾，全靠「背後的女人」容媽媽，給予無限支持及照顧，令她捱過難關！

Joey說：「呢排忙緊籌備演唱會，冇乜時間休息，但我會好好叉電，排走體內多餘嘅『Ram』（記憶體）！之前中醫話我『陰虛』，呢樣嘢最難搞，唔係話只係食啲補品就有用……我要多謝媽咪，經常煲愛心靚湯，加上我鍾意『灌水』排毒，Keep住潤喉！」提起家人，Joey表示就算工作再忙，也會抽空陪媽咪：「佢係我背後嘅女人！好多時都遷就我嘅Schedule（時間表），處理咗我嘅嘢先，因為我平時做嘢忙，好少陪佢，所以收工一定返屋企陪佢！」

讚弟弟有風度

除了感激母親關懷備至外，Joey對弟弟亦讚不絕口：「唔知點解，每次我收工返屋企總會係一袋二袋嘢拎番去，細佬會落樓幫我拎番屋企，好有紳士風度！」她大讚弟弟為人有禮，性格又純品：「佢冇因為家姐係藝人，而有特別嘅價值觀，佢冇壓力，都係過正常生活。我成日同佢講，因為我哋喺單親家庭長大，經常同佢思想教育，做男人要有承擔嘅心！（佢有女友？）有呀！佢哋識咗好耐，兩個都好夾！」她甚欣賞「未來弟婦」，笑言要逼弟弟結婚：「拿拿臨啦！要生BB，到時我就做姑媽，我都好鍾意小朋友！（你呢？）難得呢排瘦番，生BB嘅嘢暫時未知喎！」

等與Eason合唱

雖云「同行如敵國」，但無礙Joey於圈中交朋結友，Eason、鍾欣桐、張敬軒、何韻詩及黃偉文等都是她的知心友。提起Eason，Joey表示現時各有各忙，加上他們分屬不同公司，「祖臣配」的合作機會較以往少，但她仍緬懷合作的日子：「雖然少咗見面，不過有時喺私人聚會上碰面。我好欣賞佢，台風好睇、唱功好聽，上年我哋合作『拉闊音樂會』，感覺好正，同佢合唱當然冇問題，但要睇公司安排！佢之前仲話想寫首歌畀我，不過等咗好耐都未成事！」