Eason縈繞在心

一位是歌王、一位是天后，舞台上，陳奕迅（Eason）及容祖兒（Joey）受盡歌迷萬千寵愛；舞台下，兩人與平凡人無異，對妻女及母親呵護備至，默默愛護「背後的女人」！Eason憶述由單身變成有配偶的重要時刻；Joey則表示與媽咪「亦母亦友」，親情滿瀉！

向來爽直的Eason坦言，拍戲時難免會與女對手互生情愫，早年經常與Joey在電影中演情侶的他，未知曾否對她動情？Eason強調導演甫喊Cut，他便即時抽身，想起現實中「背後的女人」老婆徐濠縈（阿徐）及女兒康堤。他表示在台灣遇地震都會即時致電老婆，大、小事上亦可見阿徐在Eason心中的地位：「結婚後申請美國簽證，喺配偶嗰欄寫佢個名，依家我有伴侶，好過癮，仲影咗相添！」

Eason堅稱婚戒不代表感情好壞，粉碎外界的婚變揣測：「報道成日話唔戴結婚戒指就係感情唔好，傻啦！做嘢驚甩，我試過唔見，覺得戴咪戴囉！我發覺依家好多女人都唔戴，男人先戴！（因為襯唔到衫？）Exactly（絕對）！我試過唱歌時左手握手，天氣凍、冷縮熱脹，Fans差啲勾咗我隻戒指走！戒指咁特別喺結婚嗰日交換，整番第二隻都唔同，不如收埋唔戴！」

不排除生多個

阿徐曾表示從小到大都被認為好生養，但二人目前只有康堤一個女兒，問到可會再生BB？Eason認真地說：「都好！（阿徐話可再生BB？）佢冇同我講過喎！佢忙時裝生意，冇特別計劃。我鍾意研究人性，同朋友傾獨生問題，有多個都好！我有哥哥，你可以話複雜啲，不過點都好，獨生嘅長大會有同學去比較、分享，有心事同人分享都得，不過兄弟姊妹嗰種互相照顧、互相扶持，感覺會好啲！實際啲，我經濟上唔得，難同朋友開口，親兄弟會易啲，講咗出嚟，佢有立場話唔幫或者幫唔到，起碼都叫易啲開口！」

「造人」要講情調

既然有意為康堤多添弟妹，為何不加把勁力追？Eason不禁笑說：「唔係話整就整！（意願係可以？）係！不過畀我就想有情調，唔會話：『嘩！嚟喇！整喇！』人係感情動物，唔會話：『不如……』我想營造氣氛，有浪漫嘢，出去食個燭光晚餐，咁樣會舒服啲，唔可以強迫，情調好緊要！」至於BB的性別，他則表示冇所謂。