莊思敏籲報警求助

藝人多數透過經理人接Job、傾價錢及追酬勞，若沒有經理人便難以確保工作質素，甚至構成危險。

莊思敏：

我試過行完騷之後間製作公司執咗笠，一蚊都收唔到！好彩只係萬幾二萬蚊！我認為韓君婷應該報警備案，佢可以走得幾耐？唔通退出娛樂圈咩？而且我覺得對方可能只係口頭上嚇吓你，唔會真正採取任何行動，加上香港係法治之區。

張文慈：

喺內地做嘢真係防不勝防，我都試過被恐嚇！幾年前去深圳幫一間會所拍廣告雜誌，去到原來係桑拿室，見貨不對辦想走，但佢哋唔畀，焗住要拍埋先！最慘係張支票彈票收唔到錢！我會盡量揀一啲相熟嘅工作做，如果唔熟悉嘅單位，我會安排司機，有咩事都可以第一時間走人！仲有要收晒現金先開工！

姚樂怡：

通常最少收一半訂金，出場前先收埋尾數！戥韓君婷唔抵，警惕其他人唔好再中計！我有自己嘅公關同製作公司，呢啲公司唔好破壞其他正經接Job公司嘅聲譽，我公司都有幫其他藝人接騷，雙方會傾好晒先，藝人一定收晒錢先！

李蕙敏：

一定要簽合約同先收一半或以上訂金，我初出道嗰陣曾經被騙酬金，之後由相熟Agent接洽，就算搵我去非洲唱歌，有Agent確保場地同主辦機構冇問題，收足錢就出發！做藝人好被動，有時畀人搵咗笨都投訴無門！

肥　媽：

出面接Job好危險o架！又唔知人哋係咩人，所以畀經理人呢10%、8%佣金真係唔少得！作為藝人尤其係女仔，有時點樣去搵人收錢呀！其實我同韓君婷都好熟，佢可以搵我幫手o架！