韓君婷遭爆粗恐嚇避走獅城

韓君婷日前在網上自爆受騙，以為成功找到新公司，惟接Job以來不但冇人工，拒絕出席私人活動更遭粗言穢語辱罵及恐嚇，嚇得她急急訂機票於下月返家鄉新加坡避風頭！

亞姐冠軍韓君婷近年減少幕前演出，其暴肥又暴瘦的身形一直成為追訪焦點。最近工作驟減的她，日前在網上自爆早前認識一名製作公司老闆，對方欲羅致她成為旗下節目主持人，本以為事業漸露曙光，豈料對方竟以先測試雙方合作火花為由，要求她先接Job才正式簽約，並強調酬勞照付！韓君婷最初不以為意，為對方先後拍下兩集訪問藝人的節目，惟事後對方不但沒有給予任何酬勞，更銷聲匿迹長達四個月！

遇合適工作再返港

最近公司老闆再度聯絡韓君婷，要求她出席在杭州舉行的一個私人派對活動，為免再度受騙，她斷然拒絕，卻換來對方出言侮辱恐嚇。昨日本報記者致電韓君婷查詢，她直認刻意在網上公開事件：「當日佢用粗口鬧我同恐嚇我，仲叫我出街小心啲！（屋企人知唔知呢件事？）知！佢哋仲擔心我人身安全，叫我返去新加坡避吓，所以我下個月都會返去！（考慮報警？）唔會！因為當時我冇錄到音，我諗對方當時都只不過係一時之氣先用粗口鬧我同恐嚇我，但如果情況再壞的話，我會有進一步行動！」並直斥對方的行為取巧：「其實佢哋只不過係搵我哋呢啲冇經理人嘅藝人着數！（咁你會留喺新加坡幾耐？）如果遇到合適嘅工作都會返嚟，唔係全面退出！」她再三呼籲藝人接工作前要小心處理，避免受騙。

口頭承諾具法律效力

對於韓君婷被拖欠薪金，黃國桐律師表示以口頭承諾洽談的工作亦具法律效力，故她可向有關公司追討欠款：「除咗房地產外，所有商業合約，除咗文字，口頭承諾都有法律效用！佢已經履行咗合約，如果數目大嘅可以搵律師幫手追討！」至於遭恐嚇一事，黃國桐律師強調即使沒有錄音證據，鑑於其藝人的公眾身份，警方亦會受理：「呢個係刑事恐嚇！『出街小心』對一般人嘅恐嚇成分不大，但藝人係公眾人物，唔難畀人知道行蹤，呢啲說話會令佢哋感到被恐嚇。佢報警嘅話，CID會調查。」