諸葛梓岐讚BB似天使

李家傑找代母「一索三男」，令圈中人議論紛紛，而與他曾傳緋聞的諸葛梓岐則大讚BB可愛！

諸葛梓岐：「Send咗短訊畀佢，覺得BB好可愛，真係好似天使！戥佢好開心！好似爸爸，個樣仲好聰明！（你會唔會想生番三個？）咁又太誇，我怕肚皮鬆弛，生兩個就夠，最好係龍鳳胎！不過唔係呢個時候生！有聽過朋友搵代母生仔，不過都係一啲上咗年紀嘅Auntie，生唔到冇辦法先搵代母。（幾時探BB？）遲啲有機會先探！」

蘇永康：「四叔有咩反應？（向員工派大利是。）恒基啲樓應該平10%啦！（徐子淇有壓力？）佢咁後生，生多兩個，四叔都咁鍾意！佢哋間屋幾萬呎住隊軍隊入去都得啦！」

謝安琪：「唔知有呢單新聞！接受到，身邊有朋友好想要小朋友，做埋試管嬰兒都唔得。（提議畀朋友？）都會！」

A. Lin：「生仔派成萬蚊利是畀員工，我經理人阿Roy生仔連一千蚊利是都冇派，下次徐子淇生BB要即刻去佢哋公司打工！」

伍詠薇：「我冇諗過搵代母，覺得李家傑做法好前衞，好正面。」

陳法蓉：「生BB要十月懷胎，我會唔捨得畀人，我唔需要代母，我諗我生得出。」

黎耀祥：「真係戥四叔開心！希望佢呢個風氣延續落去，話唔定我哋遲啲都有得收，派埋利是畀我哋。」

陳倩揚：「我都想逗四叔一萬蚊利是。（想四叔快啲做無綫老闆？）兩樣嘢，但生仔係件開心事，搵代母呢個方法都好前衞。」

胡杏兒：「人一生只活一次，應該要嘗試一下做母親嘅感覺！（計劃？）未！我好後生咋！」