古仔拒搵代母 揀傳統方法

李家傑借代母誕下三個金叵羅，抱孫的四叔李兆基笑得見牙唔見眼！同樣是城中金鑽王老五的古天樂卻唱反調：「我仲有能力時會選擇傳統方法！」反觀楊其龍和陳細潔卻舉腳贊成！

恒基地產主席李兆基坐擁千億地產及股票王國，一直心急繼後香燈，隨着大公子李家傑到美國找代母於7月誕下三胞胎後，如今四叔有三個男孫在手，即時鬆一口氣！李家傑成功造人，頓時掀起城中一片代母產子熱潮，同樣是金鑽王老五的古天樂、周星馳、胡文新及霍啟剛等，未知會否效法？其中古天樂昨日接受本報電話訪問時，坦言從未考慮過借代母產子：「我係比較中國人嘅思想傳統同保守，所以唔會諗！」他會以傳統方法傳宗接代，並笑笑口說：「我諗我仲有能力嘅時候，我應該會用傳統方法！」

媽咪冇催婚

可是古仔已年屆40歲，問到母親會否恨抱孫催婚？他說：「我阿媽從來唔會過問我結婚嘅事，我亦都從來唔會向外發表我嘅感情事，一切隨遇而安！」對於代母產子日漸流行，他說：「以我所知外國好興領養同埋借代母，不過呢啲例子喺中國人社會比較少見，但隨着社會同思想不斷轉變，我諗會愈來愈興！」此外，有傳古仔兩個月前以3.1億元放售香島道獨立屋，淨賺1.5億元，他否認：「根本冇咁嘅事，我根本冇買過！」

這邊廂古仔唱反調，那邊廂的楊受成兒子楊其龍（Gilbert）及名媛陳細潔（Abbie）卻認為代母產子不失為權宜良方，Gilbert說：「好主意！當買個保險，如果冇老婆但想生小朋友可以諗！我都係初步諗吓，都未搵到合適醫生同診所。（找代母係咪要舒淇嘅性感類型？）冇諗過喎！如果有人肯生已經好開心，我意思係年紀愈大又冇伴侶，我唔會排除！」而Gilbert姊姊楊諾思則踢爆他有過此想法：「嫲嫲過身時，佢有講過，佢又話你哋結晒婚，又冇合適對象，我都鼓勵佢！」

另外，Abbie坦承會考慮：「唔係錢嘅問題，而係養育問題，我有個朋友生唔到，但佢奶奶好想抱孫，就用咗150萬搵人生！」此外，與李家傑同是佛教徒的王喜，被問到會否效法對方搵代母生仔？他說：「人有好多種，即使信唔信教，都會有啲人喜歡用叉食飯，有啲人喜歡用筷子食飯，唔同嘅人有唔同嘅選擇，我會考慮下。」