最成功虛擬樂隊

Gorillaz以四位卡通人物作生招牌，但幕後主腦其實是Blur主音Damon Albarn與英國漫畫家Jamie Hewlett，前者負責創作音樂，後者則主攻美術和拍MV。樂隊01年憑《Clint Eastwood》紅爆全球，先後推出三張大碟，累積銷量逾2,000萬張，07年更打入健力士紀錄大全膺最成功虛擬樂隊。樂團一向大玩多元化及多媒體，近日獲微軟邀請擔任全新瀏覽器Internet Explorer 9的宣傳夥伴，為其試用版製作大量多媒體短片及內容，展示上網樂趣。

記：記者 J：Jamie Hewlett

記：香港將會係你哋世界巡迴嘅亞洲唯一一站，點解？

J：香港係我哋五年前初次踏足中國嘅首個地方，實在有好多美好回憶，又見到唔少好正嘅人，好有啟發性之旅！如果反應好嘅話，我哋都希望加場。

記：今次來港會帶邊啲樂手同行？De La Soul、Bobby Womack同The Clash兩位前成員Mick Jones同Paul Simonon係咪都會隨隊？

J：冇錯！新碟大部分客串樂手都會嚟，Lou Reed因檔期問題只會出現紐約騷，Mos Def同Snoop Dogg都好忙，確實人數未定，但肯定大堆頭嚟晒，一定好熱鬧。

記：今次係Gorillaz首個全球巡迴演唱會，準備工夫如何？

J：自從六月嘅Glastonbury音樂節後，我一直忙於喺倫敦更新舞台視覺同錄像效果，仲加入新嘢，上星期終於大功告成！四月嘅Coachella音樂節因為太匆忙，部分片段未能盡善盡美，今次巡迴加多咗六首歌，會唱足兩小時，仲拍多好多短片，真係可連成一部長片，效果好滿意。（係咪每首歌嘅片段都唔同？）係！每段風格都唔同，我仲加入唔少新角色，連埋一齊好工整！

目標遊覽傳統「型」地

記：覺得香港有咩地方吸引你哋？

J：第一次嚟嗰陣覺得好震撼，啲高樓大廈、霓虹燈同氣氛冇得頂！記得上次喺一間頂樓餐廳食飯望住維港，簡直嘆為觀止。（今次想去咩地方？）希望去一啲型格得嚟又富傳統特色嘅地方。

記：上次你哋來港寫咗首叫《Hong Kong》嘅歌，今次會唔會添食？

J：上次真係玩得不亦樂乎，第二日Damon就有靈感寫咗呢首歌。添食當然會啦！Damon會帶備四聲軌錄音機同行，點解唔得？

記：你喺英國舉行巡迴水彩畫展，到底係咩一回事？

J：我同樂施會關係好好，一直傾緊點樣合作，舊年九月終於抽到一個月時間，去孟加拉睇吓氣候變化同當地水災嘅關係，又睇吓村民如何應付暴風同小朋友嘅遭遇，係一次洗滌心靈之旅。記得喺Char Atra有一條村落每年都會被沖走同重建，實在難以置信，好多村民因此失去孩子，小朋友要用頭頂住書本游水半哩返學，真係令人動容。我希望每年都可抽啲時間繼續呢個關愛村民行動。

記：你哋同華裔舞台導演陳士爭合作改編《西遊記》嘅雜技歌劇《Monkey：Journey to the West》好成功，係意料之內定係意外？

J：其實係故事本身出色，真係好鍾意個古仔同角色！我自細已經煲《西遊記》電視劇，能夠有機會參與真係好興奮！呢套係我首齣歌劇，當然要加把勁，將整個中國班底帶到英國皇家歌劇院亦不容有失，嗰啲馬騮、雜技同空中飛人場面要完美配合，我試過因為太擔心出錯，每場只敢睇十分鐘就走人！

榮幸製京奧開幕動畫

記：套劇係咪英國廣播公司（BBC）邀請你哋為京奧節目製作開場動畫片嘅原因？

J：冇錯！我哋本來同奧運風馬牛不相及，但佢哋邀請我時當然卻之不恭！我哋為《Monkey》製作歌劇同唱片，再為BBC奧運節目拍動畫短片，四年內共製作咗三個版本，我都唔敢相信！

記：你係宮崎駿嘅粉絲，最欣賞佢咩嘢地方？

J：除咗深受《阿基拉》（日本動畫）影響，我就最喜歡宮崎駿，最欣賞佢細膩嘅畫工、筆觸同故事性，好有啟發性。

記：依家嘅流行樂壇仲令你驚喜？

J：我盡量唔關心太多，我欣賞Lady GaGa嘅努力，但佢唔係我杯茶，至於Justin Bieber就更加唔理，畢竟我都42歲，佢唔係屬於我個世界。