張栢芝與劉嘉玲相隔六年再鬥戲，繼04年合作電影《性感都市》後，二人即將拍攝黃百鳴的賀歲片《最強囍事》，不過未埋位已傳出是非！據知，久未拍輕鬆笑片的嘉玲原是第一女主角，第二女主角則是熊黛林和Angelababy，原本她的戲份由頭帶到尾，殊不知臨門一腳，黃百鳴在九月份宣傳時表示以千萬片酬成功邀得栢芝復出，令嘉玲戲份和片酬被迫瓜分！由於栢芝是久休復出，片酬千萬超越五百萬身價的嘉玲，過往兩人合作《性感都市》時，嘉玲都是第一女主角，而栢芝只是第二女主角，如今栢芝後發先至，蓋過嘉玲聲勢。
戲服各有各靚
有傳導演目前為《最》片戲份大傷腦筋，因論資排輩應以嘉玲為先，可是今次是栢芝復出之作，一定要多加利用，加上百萬日薪，相對戲份較重，但為免得失影后嘉玲，亦要顧及她的戲份有得發揮，以避免兩人拍戲時有爭拗而影響進度，屆時兩女除鬥戲之外，戲服方面亦盡量平衡，鬥戲亦要鬥靚。
昨日嘉玲現身SK-II產品活動，她透露剛完成《狄仁傑》片巡迴宣傳，稍後便會參演黃百鳴的賀歲片，雖然被栢芝突然「加入」，但她仍大方表示期待，信心十足的說：「一直都好想拍攝一部輕鬆電影。」可見她對與栢芝鬥戲一於少理。提起老公，嘉玲更甜絲絲，問到可有幫偉仔護膚？她說：「見到就會，呢啲係情趣，可以增進感情，同埋佢皮膚愈來愈好。」她透露偉仔身在內地拍戲，由於手傷尚未完全康復，故打戲部分要就力和以物件來支撐。對於有傳她出席商天娥婚宴時與吳君如零交流，她說：「點可能？我哋有影相同傾偈，平時都有通電話，嗰晚我由門口開始打招呼到坐低，成個半鐘都未打完。（想唔想再拍劇？）真係要諗清楚！我年紀唔細，拍劇需要體力應付。」
黃百鳴唔敢大細超
慘成「夾心人」的黃百鳴昨日出席《香港電影回顧展2010》記者會時表示，《最》片預計5,000萬製作費，並在內地和香港取景。為免得失嘉玲，他大讚嘉玲演戲甚有經驗，問到栢芝是否千萬片酬？他說：「呢個係商業秘密，唔講錢呢個問題。（好值？）不嬲請人都覺得佢哋值！」事後再致電他，問到有傳嘉玲和栢芝爭戲？他說：「唔會！冇呢個問題。（好頭痛？）唔會！會好平均！（海報企位呢？）到時先算，唔會好麻煩，我哋套套大片，冇問題，會處理到。（唔怕嘉玲唔開心？）唔會！冇呢個問題。」