在80年代擁有「剎那光輝」的蔡楓華，前晚錄完《勁歌金曲》後，乘坐TVBuddy座駕到酒店消夜，車上有一束寫着「蔡楓華加油，支持你的歌迷」字樣的鮮花，未幾拍檔盧敏儀亦到達，齊齊邊食邊傾，個多小時後，敏儀埋單後先行步出，問到為何不送蔡楓華離開？她說：「OK㗎喇！」然後獨自駕車離開，未幾蔡楓華與友人亦步出大堂，期間他隔着玻璃向門外記者指手畫腳口噏噏，職員即示意他退後。

約10分鐘後，敏儀折返酒店接蔡楓華及友人，他上車前說：「稍後再同大家見面交代近況！」說罷給了30元貼士給泊車員。座駕途經三號幹線駛向錦田方向，期間敏儀突然在巴士站停低向記者求助：「蔡楓華唔認得路，你哋可唔可以帶路？」臨入村前，蔡楓華再度表示會在下月出席CASH活動：「你哋唔好再跟，否則我會叫Police！」然後便返回寓所，昨日整日也足不出戶。

邊食邊傾

豪畀貼士

趙雅芝：哥哥會開心

蔡楓華復出引起關注，趙雅芝昨日出席中藝活動時表示，二人昔日曾有一面之緣：「我好替佢復出而高興，相信哥哥（張國榮）在天之靈都會開心！作為前輩，我好想佢可以重新振作，希望大家畀多啲正能量佢！」