由英皇發行的電影《狄仁傑之通天帝國》昨晚舉行首映，導演徐克、劉嘉玲、李冰冰與內地演員鄧超等演員晒冷現身，楊受成夫婦亦有捧場。楊諾思則以英皇鐘錶珠寶董事總經理身份，向嘉玲等頒發紀念品。兩位女主角嘉玲與冰冰同獲英皇珠寶贊助鑽飾，珠光寶氣，行頭十足，但當中嘉玲以接近貴七倍價錢的贊助，撼贏冰冰成條街。

李冰冰雖然行頭有所不及，但論高貴則絕不輸蝕。

楊諾思以英皇鐘錶珠寶董事總經理身份，向嘉玲等頒發紀念品。

認與曼玉有聯絡

以一襲黑色長裙出現的嘉玲，耳環、手鈪、戒指、頸鏈與心口針等共1,500萬行頭閃爆出場，十分搶鏡！對於丈夫梁朝偉身在內地未能相伴，她表示各有各忙，已習慣少見面。問到偉仔有否要求她北上探班？嘉玲說：「佢從來都冇要求，反而自己想上去探，想睇佢打成點！（擔心佢受傷？）都係！佢成日都受傷！（偉仔有冇同你通電話嗲你？）都好正常啫！（佢有冇睇呢部戲？）偉仔咩戲都睇。佢基本上都唔畀評語，但呢部戲因為爭議性大，我好想佢講吓。」

徐克帶領演員斟酒慶功。

雖然由威尼斯鬥到香港，但無損嘉玲與冰冰的感情，不時咬耳仔。

提到行頭撼贏冰冰，嘉玲表示不知情，因一切聽從公司安排。談及「舊情敵」張曼玉早前於水都表示會捧《狄》場，結果卻沒有出現，嘉玲大方地說：「係啦！你哋仲話佢會睇我部戲！（失望？）唔會！佢肯定有嘢做先冇嚟。其實我哋私下有聯絡，佢同徐克、梁家輝都熟。」至於身穿紅色連身裙的冰冰，對於行頭不及嘉玲，她說：「我不知道，還未見到她。不過，拍戲時嘉玲教我很多東西，所以待會見到她會再次說謝謝。（對票房有信心？）有十成信心吧！」

鄧超仍未娶孫儷

此外，《狄》片的內地男藝人鄧超昨日宣傳時否認與女友孫儷已婚，表示現時感情很好。問到可有結婚打算？他說：「這些不用計劃的，一有感覺就去做，是很順理成章的事，到時再通知大家吧！」