少女組合HotCha三位成員Winkie、Regen及Crystal情同姊妹,有咩私事都攤出嚟講,有次小小So見佢哋出席音樂會嘅綵排時齊齊「依起棚牙」,原來佢哋食完菜互相檢查菜渣,Winkie仲差啲忍唔住想幫Crystal撩牙!佢哋仲話連男友都會攞出嚟同班姊妹傾!
小小So:你哋鍾意咩類型男仔?
Winkie:我鍾意陳曉東型,佢出道時已經好鍾意佢!
Crystal:我就鍾意郭富城,細個有着佢個樣嘅T恤!
Regen: 我就鍾意大隻仔!
小小So:咁你哋咪唔會爭仔囉?
Regen:係呀!我哋三個都鍾意唔同類型嘅男仔!
小小So:乜Crystal唔係鍾意陳柏宇嗰類型咩?你同佢傳緋聞喎?
Crystal:梗係唔係啦!
Regen: 佢(陳柏宇)咁肥!
Winkie:佢背脊有把劍(紋身)!
小小So:你哋有冇向心儀男士表白?
Crystal:冇呀!因為我依家又鍾意咗吳嘉龍,之前就鍾意羅拔柏迪臣,佢超靚仔!我之前日日都同人講鍾意佢。