早前是非纏身的黃長興，曾斷言表示絕不會靠女人，會靠自己一手一腳搵錢，他亦講得出、做得到，7月初將辛辛苦苦儲來的數十萬元積蓄開法國餐廳！據知不論裝修、請師傅、試紅酒及請侍應等工作，他都一一包辦，開幕當日，除了不少圈中好友撐場外，正印女友Peggy更恍如女主人般打點！別以為長興升呢做老闆就歎世界，其實他每朝都會返位於天后的餐廳準備，絕不假手於人！

親自捧餐 黃長興雖然貴為餐廳老闆，但他仍落手落腳下場，相當賣力！	屈身上菜	清潔善後

女性顧客較多

記者日前到長興的餐廳，其時臨近午飯時間，門外已企滿客人，內裏更是座無虛席！雖然餐廳有多位侍應，但長興依然落場幫手，除了為客人介紹菜式外，更親自落單、傳菜、甚至送客及執拾餐枱等工作，與侍應並肩作戰。未知是否有這位靚仔老闆坐鎮，當日見不少女性客人捧場。至於長興任職銀行巿場部的女友Peggy亦辭了職返舖幫手，實行以「夫妻檔」上陣！不過，為免遭員工閒言閒語，他們工作時不會喁喁細語，各自在店內「氹氹轉」工作，公私分明。

黃長興出店外整理餐牌，大可順道人肉宣傳吸客。

力不到不為財，難怪長興做到標汗！

工作逾12小時

現場所見，長興暴瘦不少，事後他接受電話訪問時說：「我真係瘦咗好多！由開舖至今已瘦咗7磅！依家我每朝10點幾就會返餐廳，做完Lunch嗰轉啲客走晒先會食午飯，夜晚執完文件又要招呼啲客，返到屋企12點我太攰，飯都唔食就瞓喇！（女友都捱到瘦？）佢都瘦咗少少！（心疼？）咁咪仲好，Fit啲囉！」記者笑說不少女性客人幫襯，會不會是見他坐鎮所致？他說：「咁又唔知喎！不論男女我都係咁招呼！」初任老闆的他坦言，餐廳仍有不足之處：「好似人手啦！始終要同佢哋夾得好好，啲員工全部由我自己Interview，我要求好簡單，最重要係快手、有笑容同埋講求衞生囉！」