機動遊戲篇
問:玩機動遊戲會唔會嘔?
Rainbow、Vilian:唔會。
Ar Yu:會,仲會腳軟同心寒!
解讀:Rainbow同Vilian總算大膽,Rainbow自爆與朋友去海洋公園玩咗五、六次跳樓機都面不改容,而Vilian表示除了跳樓機,甚麼機動遊戲都會玩!反而Ar Yu比較弱,提起機動遊戲就怕怕:「以前連搭車都會嘔!好彩克服咗。」
信鬼篇
問:信唔信有鬼?
Rainbow:信,但唔會驚。
Vilian:信,唔敢睇鬼片。
Ar Yu:信,但平時好鍾意聽鬼古!
解讀:三女中以Ar Yu是最愛聽鬼古,她說:「我又要睇又要驚,想挑戰吓膽量!」有時她也愛講鬼古嚇人!而Rainbow就相當理智,直言唔驚鬼:「我信鬼係存在,但只要我冇做過虧心事,就冇咩要驚!」
外星人篇
問:信唔信有外星人同飛碟?
Rainbow:信,因為寧可信其有,不可信其無。
Vilian:信,個宇宙咁大。
Ar Yu:信。
解讀:向來愛看神怪東西的Ar Yu又發揮「靈婆」本色,提起外星人及飛碟即說個不停:「有時會上網睇啲有關外星生物嘅短片,我覺得會有其他生物嚟地球!」而Rainbow及Vilian則相信外星人存在:「個宇宙咁大,好多未知嘅嘢!」
頭髮篇
問:有冇諗過剪Skin Head?
三女異口同聲說:冇!
解讀:Rainbow即認為男仔剪的話會好看得多:「我剪好怕會變咗做一休和尚!」而Ar Yu雖然都沒有勇氣嘗試,但原來現時留了長髮的她,小時候經常剪男仔頭:「我六、七歲都剪過,嗰時媽咪覺得咁樣方便打理。」
曱甴篇
問:看到曱甴會有甚麼反應?
Rainbow:好驚!
Vilian:會走到勁遠!
Ar Yu:大叫,即刻跳上床。
解讀:其實女仔看到曱甴雞飛狗走是相當正常,Rainbow相當聰明,因為她會用手掩着耳仔急閃:「我驚隻曱甴飛入耳仔裏面!」而Vilian除了即時彈開外,更會找「外援」:「我會搵屋企人幫手,之前喺酒店見到就打去Reception!」