李蘊喺書展期間推出處女寫真加EP,雖然冇令人睇到噴鼻血嘅E Cup巨胸,但勝在夠青春、有新鮮感,好似早前講明撐周秀娜嘅Fans,一見到李蘊真人即刻唔怕火羅「變心」,話李蘊先係佢哋嘅女神,李蘊梗係開心,不過佢話為咗拍呢本寫真集,差啲搞出人命,命喪浴缸!
小小So:影寫真都會影到冇命咁誇張,到底發生乜嘢事?
李 蘊:咪嗰次拍浸浴照囉!因為酒店個浴室好細,啲工作人員又多,又要打燈,搞到空氣唔係太流通,好鬼熱,工作人員怕我凍親,不停咁加熱水,你哋睇到啲相好似冇乜嘢咁,其實我焗到塊面紅晒呀!
小小So:只係面紅啫?
李 蘊:咩呀(十個嬌嗲)!真係好辛苦,我影到見暈,出現中暑迹象,最後我頂唔順,要上水抖一陣先可以再拍過,真係有苦自己知!
小小So:今次反應咁好,下次會唔會再推出更勁嘅寫真集?
李 蘊:如果反應好都會㗎,可以仲性感啲添!不過一定三點不露,因為太過火,我接受唔到囉!