父親是西班牙裔菲律賓人的杜德偉（Alex），昨日剛從台灣來港，與家人收看直播，直言非常心痛，還狂轟當地警方拯救行動緩慢：「警方應該快啲救人，佢哋太慢、太怕事同太冇計劃，點可能用繩拉開車門？有人質死咗真係好唔抵！應該搬大光燈照住架旅遊巴，點可能掟螢光棒入去？都冇用！」他還斥有報道指人質全歿：「呢啲嘢唔可以亂講，家屬睇到真係會嚇死！如果係我一定暈低。聽到有人質不幸罹難實在難以置信，但會為佢哋祈禱，慶幸有生還者。」

JC憂獲救童心理

Alex還自言甚少往菲律賓，不清楚當地治安：「我有親戚喺菲律賓，稍後會打電話聯絡。其實依家唔係治安問題，係有個革職警察報復，全世界都有可能發生！」他還指父親對事件感遺憾：「爹哋睇到菲律賓警方失職，處事無能冇效率，好失望。」

混血名模Jessica C.的母親是在當地長大的中菲混血兒，故JC本身略懂菲律賓語，今年三月更曾返菲律賓探親。對於港人在當地被挾持後遇害，JC說：「我睇唔到電視直播，但從經理人口中得知事件真係好震驚同好恐怖，冇諗過開開心心去度假會變成唔開心。我最擔心獲救小童嘅家人情況，關心佢哋成長嘅心理。」其他藝人事後直言對當地失信心如陳嘉容等，楊思琦原本打算十月與家人到菲律賓旅行，但現考慮取消。梁漢文在微博爆粗鬧槍手，但隨即刪除。

羅仲謙責處理不當

07年曾擔任菲律賓旅遊大使的江若琳，電話受訪時頻頻嗚咽，表示今次發生一件冇人想發生的事情，心情大受打擊：「好痛心、好震驚、好嬲！點解會有人傷害一啲無辜嘅人？原本係一個開心嘅旅程竟然變成一個悲劇，好難接受！唯一希望受影響嘅家屬可以堅強同振作。」她亦於微博怒斥：「這位惡魔還是人？你被人革職是你要承擔的問題！」同是菲律賓旅遊大使的羅仲謙得知事件後亦表示痛心及震驚，絕不希望再有同樣的事情發生，同時斥當局在事件處理上有不恰當的地方。

另外，澳門馬評家熊良錫於八、九十年代與叔父董驃於菲律賓做生意，他表示當時是最動盪時代，看慣槍林彈雨：「喺嗰邊係好閒事，當年經常發生示威，成間酒店住客都被挾持做人質！幾日幾夜都冇事。」