昨晚G.E.M.出席《盛夏音樂2010》閉幕Finale音樂會，對於妹妹Elaine上台表演唱歌，G.E.M.大爆妹妹忙於練歌，已有一星期沒有回家食飯，更建議妹妹不要緊張。至於會否帶妹妹入行？她說：「等佢自己諗，仲讀緊中四。（怕影響學業？）佢成績好好，比我自律，唔擔心。」
生日願望謝絕愛情
而明日19歲生日的G.E.M.坦言會與家人吃飯慶祝，生日願望有四個包括事業、音樂、跳舞和健身。至於愛情方面，她笑說：「唔納入願望範圍，但粉絲送咗套米奇老鼠套裝，仲用嚟拍咗套短片，放上網畀Fans睇。（想有男仔追？）冇，因唔想分心，就算有，都會拒絕。（點解？）因為太多緋聞，全部都係假，唔想再解釋。」
至於上周五G.E.M.在澳門舉行演唱會，豈料有自稱是她粉絲egc，在網上發表「G.E.M.不為人知的一面」的文章，表示完騷後想找G.E.M.簽名，竟遭冷待：「佢對我們一班Fans好冷淡，佢台上台下真係兩個人咁，180度轉變，再叫多次佢簽名，佢冇回應就走了……」G.E.M.澄清往慶功宴途中遇到兩名男歌迷，有停車讓對方拍照，但該歌迷沒有要求簽名或合照，她有道別才離開：「我一向得一個樣，忍唔到唔講嘢，絕對冇可能冷淡。我專登揀咗架開揚啲嘅車等Fans見到我，仲整咗V字手勢畀佢哋影相。（點睇網上無理留言？）唔嬲，網上成日都有啲譁眾取寵同失實言論。」
擇偶條件要自愛
此外，G.E.M.昨日與EO2出席《夏日足球狂熱嘉年華》，她自爆前男友是足球門將，經常踢到周身傷：「佢舊傷未好，新傷又嚟，好心痛，但男人以傷為榮。」分手後大家還有在Facebook聯絡，發現對方打拳以致嘴角流血的照片。G.E.M.表示擇偶條件不一定要斯文，但希望男友自愛。而G.E.M.早前在《國語力頒獎禮》上與緋聞男友林宥嘉刻意避忌，她笑說：「再傾偈又唔知大家會點寫、點諗？但我哋私底下仲係好朋友。」