近期忙於舉行巡迴個唱的陳奕迅（Eason），前日在廣州宣布加場，對於被質疑開演唱會搶錢，Eason否認之餘，還四両撥千斤，將鞏俐乳溝擺上枱，大呻現今風氣差。
陳奕迅前日在廣州舉行記者會，宣布下月在廣州體育館舉行的演唱會將加開一場，成為今年破天荒加場的男歌手，更獲大會送贈足球，寓意他的音樂傳遍地球每個角落。
對於被指頻頻開個唱有搶錢之嫌，Eason自辯指作為歌手很被動，只要有主辦單位邀請開騷，而歌迷也想聽，他就會盡力做，並笑說：「我由細到大都鍾意玩，總之開心就好。」其後他乘機呻社會風氣差，大發牢騷說：「啲人睇娛樂新聞只係知道是非八卦，好似睇套戲，淨係睇到鞏俐嘅乳溝，就睇唔到佢嘅眼神，其實鞏俐嘅眼神好有內涵，只可以證明佢哋太膚淺。」
個唱真誠示人
談到個唱內容，Eason稱會向歌迷展示最真實、最真誠的自己，問到服裝有甚麼新搞作？他笑言只會穿T恤牛仔褲：「我覺得只要有內容、力量就得，服裝只係個配套。（太太會唔會幫你設計造型？）唔會，佢依家專心搞自己嘅嘢，唔再幫我，我依家見到鍾意嘅衫就會自己買。」
至於演唱會名為「90分的快活」，他解釋表演時間真的只有90分鐘：「一個音樂會，90分鐘啱啱好，我唔想大家坐到屁股都痹，就好似寫文咁，只要寫得好，難得糊塗四個字已經好精彩。」
王仁曼讚康堤
另外，前晚Eason的愛女康堤為王仁曼芭蕾舞學校在文化中心表演芭蕾舞，年紀小小的她演出有板有眼，Eason還專程由廣州返港，與太太徐濠縈一同捧場。
而昨晚是芭蕾舞表演的第二場，校長王仁曼大讚康堤前晚的演出：「佢學咗兩年幾，好有音樂天分同節奏感，我覺得家長（徐濠縈）好好，冇乜要求，呢啲態度好好。」