祖兒和阿Sa雖同屬英皇娛樂，共事10年，但她們走的路線各異，除同事關係外，並沒有甚麼將她們拉得更近。出道11年，祖兒主攻歌唱事業，五光十色的華麗舞台是理想基地，型格和成熟是她的路線。而阿Sa與鍾欣桐（阿嬌）組成的Twins充滿夢幻少女味，與祖兒南轅北轍，連她的個人發展亦着重於水銀燈下，藉大銀幕孕育夢想。
雙子座的祖兒性格開朗率直，遇着擅長隱藏自己的天蠍座阿Sa，祖兒坦言很難打開話匣子：「唔好睇阿Sa外表可愛，其實佢思想非常成熟，做人好審慎穩陣、EQ好高。我哋會傾偈，但佢明顯有所保留，畀番啲空間自己，但大家都係呢行，好明白嘅！」阿Sa的深藏性格卻沒有嚇退祖兒，她們性格各異，卻擁有相同「天性」就是Shopping，故祖兒透過購物打開阿Sa心扉，她說：「阿Sa唔鍾意周圍話畀人知最近睇中咩、想買咩，而且好少有嘢佢想要而買唔到，所以單靠送禮物好難氹到佢開心。相處咁耐，我梗係估到少少佢嘅品味，只係經常唔夠佢快，估到佢都已經買咗。所以我有絕招，就係去阿Sa嘅時裝店問啲店員，最近阿Sa有冇留咗又未畀錢攞貨？如果有，我立即找數送畀佢，肯定冇買錯，一定啱心意！」祖兒疼錫阿Sa，感情要好，但觸發她們更進一步，「版稅風波」應記一功。
風雨同路互撐
各自發展的演藝世界，直至去年底受到「版稅風波」衝擊，令香港樂壇生態產生巨變，屬於四大唱片公司旗下的歌手，因為少了一個曝光平台直接影響生計，大小音樂節目變成來來去去幾張臉，祖兒和阿Sa因幾乎每周都亮相同一個電視節目，令感情突飛猛進，祖兒說：「過往我哋經歷好多風風雨雨，互相知道對方對自己好，但以往冇時間坐低慢慢傾心事，但近呢幾個月因為成日上節目，幾乎每個星期都見面，見多咗亦傾得深入咗，發掘到阿Sa更多優點，佢好樂觀同好細心，唔會隨便激嬲其他人，我會衝動，講咗先算。」
阿Sa早已視祖兒如親姐姐，她說：「當年我未正式加入公司，但去過祖兒嘅生日會，當時我戇居居唔識其他人，祖兒主動走埋嚟同我講嘢，話當係自己屋企玩吓就得，佢好親切，入行到依家互相幫忙，完全冇爭寵同不和嘅新聞，反而喺微博互撐同幫手宣傳。」
後記 撈過界設計形象
祖兒予人驚喜的誇張造型，都是由形象師和公司決策，她坦言希望為自己「執衫」，終說服公司讓這天的造型由她決定：「今日由頭到腳都係自己話事，準備咗幾日，好緊張！」她將衣服鞋襪從行李箱拿出來配對，再向對形象設計甚有心得的阿Sa討教，虛心學習的態度便是其成功之道。
為師姐做紅娘
阿Sa大讚祖兒是開心果：「佢好搞笑，同佢一齊好開心，佢性格好好，有時佢上台講嘢，我哋喺台下都好緊張，尤其係頒獎禮，佢份人好直接，每次佢講完嘢，我哋都抹一把汗！但我好鍾意佢呢個性格，因為呢行假惺惺嘅人太多，但我唔會怕佢笑裏藏刀，佢亦唔會踩人而抬高自己，會靠自己努力更上一層樓，佢好勤力。（傾心事？）都係少女心事，我哋每次見面已經雞啄唔斷，大家又鍾意買嘢，我哋互相介紹啲好嘢畀對方。（介紹男仔畀祖兒認識？）好難，以前試過啦！咁樣介紹實冇好結果，一話介紹咋！兩邊已經掉頭走，呢啲講緣分。」談到十年的轉變，阿Sa說：「以前好多嘢係乜都計劃好晒嘅人，但結果期望愈大、失望愈大；但依家會隨緣，因為我想享受個過程，反而結果點樣已經唔太重要。」
拍戲爆肚喪笑
過往她們僅在唱歌方面合作，電影方面實屬十年以來的第一次，在英皇及邵氏合作的新片《翡翠明珠》玩餐飽。影后級的阿Sa演戲經驗豐富，相反祖兒自從六年前與陳奕迅合作《神經俠侶》後未有新作，祖兒說：「好緊張，除咗有影后阿Sa，王祖藍同林峯一路有拍戲，我好大壓力，每次埋位都緊張到胃痛！」阿Sa即笑說：「你終於明白我哋喺樂壇頒獎禮嘅心情，我企喺你隔籬嗰種感受。」
祖兒戲中飾演女山賊，並要喝酒向林峯表白身世，她說：「林峯千杯不醉，但我飲兩啖已經面紅，唔使化妝。」祖兒還大爆阿Sa飲酒後，現嬌羞媚態，問到會否愛上演戲？祖兒說：「如果係悲劇係好大挑戰，我明白有時演員好難抽身同抽離角色，容易沉溺喺角色入面。佢哋真係好勁，明明嗰場戲可能係生離死別，但鏡頭後佢哋可以講爛Gag搞笑，我就唔可以參與，因為要匿埋一邊培養感情。」戲中飾演刁蠻公主的阿Sa則表示，雖與祖兒首度合作拍戲，但過程舒服：「因為大家咁熟，可以演得盡啲同放啲，就算爆肚都好好笑！」
後記 與阿嬌微博傳情
對於現今藝人而言「微博能醫百病」，抱恙多日的阿Sa鏡頭前強裝精靈，休息時愛攤在梳化上扮死。但當祖兒與她分享微博的趣事時，阿Sa突然醒神，難怪兩個多月已登上全港「微博公主」第2位，她說：「以前唔鍾意上網留言或分享，但喺祖兒同阿嬌薰陶下，愈玩愈沉迷，依家每日都要喺微博同阿嬌傾偈。」