有「陽光妹」之稱的何思諺（Leanne），日前出席環保嘉年華。最近在廣州拍戲的她透露，除了自備餐具外，更帶備碎布自製環保袋：「我每次等埋位都會縫製袋仔，戲入面嘅家人好似老竇梁家輝同鍾麗緹都讚靚，仲問我幾時整番個畀佢哋！」
此外，Leanne為新片積極練拳，惟其戲份卻局限於喊戲，令她無用武之地，更長出不少「Bye Bye肉」，因而被「細佬」李治廷取笑：「佢成日走嚟搣我啲手臂肉，但佢啲肌肉真係練得好結實，都冇位畀我笑番佢！」早前曾參與一部小型獨立電影的她直言，終於明白何謂為藝術犧牲：「戲入面畀人打咗成50巴，打到我頸骨都歪咗，痛咗好幾日！」
