陳家樂與鄭家維這兩位英皇大細路，甫見面即雞啄唔斷，雖然兩人相識不久，但因為年紀相近而「撻着」。有結他底子的家樂，早前經常與維維出席校園騷，問到會否以組合形式出碟，家樂說：「唔會住！佢（維維）啱啱出咗碟，而且我唱歌同佢差距好遠，我又唔識和音，淨係識彈結他。」他又大玩踢爆：「我同維維講，如果我出騷有任何甩漏，佢照唱就得。有次我彈結他跌咗塊結他Pick，點知佢無啦啦一邊唱歌，一邊行過嚟幫我執番，真係好爆笑！我覺得佢執生能力麻麻！」問到經常合作會否「日久生情」？他倆說：「就算有都係兄弟情！」

維維（右）和陳家樂年紀相近，難怪話題特別多。

有結他底子的陳家樂，不打算以組合形式出碟。

強調愛女色

另外，剛推出同名處男專輯的維維，雖然是男兒身，但偏愛女人歌，加上聲底偏向「女聲」，問到有否被誤會是「攣攣」的心，他說：有！呢啲係外界睇法，又話我女人型同乸型，開頭係唔開心，點解要用呢啲詞語講我？其實我把聲同普通男仔冇乜分別！（刻意改唱腔？）試過夾硬扮沉聲！（鍾意邊類型女仔？）都係憑感覺，相處舒服就OK！如果夾硬話要鍾意邊類型，咁樣相處會構成障礙，都係順其自然啲好！」