近年o靚模紛紛推出性感月曆吸乾宅男荷包，Carol與DaDa食住個勢，將於年底推出2011年月曆，繼早前於動漫節隔空開火後，月曆大戰一觸即發！Carol與同是E級上圍的「日版Paris Hilton」椋名凜日前穿上三點式接受訪問時，揚言會全裸出擊，而DaDa則獲經理人力捧，除與數名師妹大堆頭出月曆外，更會推出個人性感月曆，誓以數量撼贏Carol！

Carol不介意性感，但要先問准媽咪。

DaDa將推出月曆，看來宅男又要破費了！

問准阿媽先影相

身材同屬34E的Carol及椋名凜，完全無視DaDa狙擊，更將對方咪咪當枕頭「賀一賀」！Carol說：「依家都係好初步傾，所有造型都由公司決定！（全裸？）我係專業模特兒，唔會介意！」不過，由於其處女寫真激嬲阿媽，因此她要先獲阿媽批准才影相：「我有同佢提過影月曆，不過佢冇出聲，依家要同佢再傾！」她表示處女寫真備受批評，但已賣出逾25,000本，將舉行慶功宴報答粉絲。至於向來走性感路線的椋名凜亦不介意全裸：「我覺得全裸未必靚，若隱若現反而更性感！」

另一邊廂，DaDa似乎當Carol冇到，更出口術表示月曆將比寫真更性感：「上次未露晒啲實力！」經常標榜有「人字胸」的她，當得知「死敵」Carol推出月曆即說：「各有各做啫！市場咁大，到時可能好多人都出呢！希望多啲人出，百花齊放仲好！（咬住佢唔放？）唔係，各有各做啫！」