昨晚一連4場的《金曲娛樂真經典》演唱會在紅館開騷，由鄭少秋、汪明荃和謝雪心等攜手演出，吸引羅家英和何麗全夫婦等撐場。秋官以黑西裝襯晒肩的汪阿姐獻唱《紫玉釵》兼共舞，他向阿姐獻吻，阿姐則大讚他靚仔，未怕家英哥呷醋！秋官更換上閃爆古裝造型，又拿出大刀與李美慧比武。
其他前輩亦陸續登場，先有心姐扮太后、關菊英以紅色長裙現身，穿上綠色長裙的華娃則兩度踩到裙腳！而屢次被形容為「小生」的伍衞國笑說：「畀人『小』咗幾十年，依家叫『伍小生』，都幾開心！」而大跳芭蕾舞的麥潔文笑言走樣，還問觀眾是否認得她。張德蘭則晒背上陣，靚聲令觀眾拍爛手掌。李思捷大唱秋官金曲《笑看風雲》及搞爛Gag。最後群星以羅文一連串經典金曲完成整晚演出。