末代會考昨日放榜，多位應屆o靚模會考生面臨學業和前途壓力，「翻版李嘉欣」Cat昨晨打扮密實抵達所讀的葵涌某中學，結果難逃升不上中六的現實。曾預計會考會有10分的Cat，收到成績單後即變臉，更拒絕公開分數：「好唔開心，分數唔想講，真係考得唔好！（重讀？）唔會，我想報讀副學士電腦設計。（幾時搵學校？）要同屋企人商量吓先。（有冇後悔入行影響學業？）唔關事，考試嗰陣我有專心讀書。」其後Cat與助手到柴灣開工拍MV，沿途愁爆講電話，她表示不少好友及妄攝隊友均有SMS安慰她，問她跟原本預期分數相差多少，她即眼濕濕用紙巾抹淚：「真係唔想講。」明顯為前途擔憂。

Facebook示愛當玩

至於家境有米的Iris與「愁爆」Cat情況差天共地，原本今年在英國升讀大學三年級的她，修讀時裝設計，她決定向學校申請停學一年，「專心」做o靚模。由於知名度上升，她的私生活亦被網友大起底，流出多張她的噴血相，相中見Iris與朋友在沙灘曬日光浴，E Cup身材表露無遺，她更搞笑地將iPod喇叭放在胸前，頓變「喇叭胸」！

網友更踢爆Iris在Facebook與一男子講肉麻情話，又向男方大講「I Love You」。昨日她在電話中否認拍拖：「佢唔係我男友，係中學同學，大家好好朋友。（你留言表白？）玩吓咋！（追你？）唔知，暫時仲係朋友！（沙灘個男仔呢？）都唔係，成班朋友出嚟玩啫！」