本文重點
張衞健（Dicky）昨日接受電話訪問時，對於有報道指安仔惡對前女友余德琳（Michelle），他說：「睇到啲雜誌報道覺得好笑，因為唔係事實，好似附屬卡咁，好耐之前大家都傾過，知道安仔冇畀卡Michelle。」有傳他與其他安仔好友都想安仔和鄭秀文（Sammi）復合？Dicky表示絕無此事，至於他站在朋友立場，是否希望兩人再走在一起？Dicky認為沒有想或不想，又有感只因安仔及Sammi是藝人才如此大回響，若發生在普通人身上，拍拖、分手只是小事。他表示沒有過問安仔的感情事，現惟有多陪安仔。
梁漢文否認唔鍾意Michelle
至於梁漢文談及安仔分手：「之前冇聽佢提過，真係唔知。（Sammi話諗過同安仔復合，但從來冇發生過？）呢個唔知，私下極度少談感情事，真係唔清楚。（雜誌話安仔爆粗鬧Michelle？）識佢咁多年，未見過佢對女友講粗口。（贊成安仔同Sammi復合？）咁大個人，冇任何意見，尊重佢決定。（成班兄弟唔鍾意Michelle？）冇，Sammi同Michelle都係咁多年朋友。」
吳國敬則表示看報道後才知道安仔分手，問到安仔的心情是否已平復？他說：「都咁大個人，感情嘅事做朋友理唔到，管唔到，亦唔敢問，唔敢知。不過，安仔咁高調勇敢講分手都應該諗得好清楚。」有指安仔用粗口鬧Michelle，阿敬說：「絕對唔信安仔用粗口鬧人，我講粗口就會，安仔係斯文人唔會咁做。（想唔想佢哋復合？）關我鬼事咩？呢啲嘢要講緣分，我哋唔係出面啲師奶，唔會諗一定要佢哋一齊！（Sammi話唔敢驚動愛情？）咁咪做朋友算啦！總之，佢哋喺唔喺一齊都係我哋朋友，佢哋同邊個人一齊都想佢哋幸福。」而阿敬坦言現在反而擔心Michelle多些：「佢始終女仔會慘啲，唔會夠男仔堅強，都我希望佢將來會找到幸福。」