24/07/2010

播放本新聞相關短片

HotCha漫遊愛情國

少女情懷總是詩,組合HotCha 3位成員各有不同的戀愛故事,當中有甜蜜回憶,也有傷心片段,雖然她們目前感情空白,但對愛情生活依然充滿憧憬,希望找到心中所愛!

Crystal:愛情冇得驚

今年25歲的張紋嘉(Crystal),性格文靜內向,曾有5、6次拍拖經驗的她,目前享受單身生活。講到曾與陳柏宇傳緋聞,她不禁笑說:「唔係以為我鍾意矮啩?我鍾意偏瘦嘅男仔,陳柏宇係肥喎!」除了柏宇,她跟王浩信、小肥等圈中好友經常一齊玩,可惜不是她那杯茶:「我哋撻唔着!因為太熟,佢哋畀我感覺好細個,我鍾意大個成熟啲嘅男仔!」

Crystal透露對上一個舊男友從事演藝工作,屬於幕後人:「我哋仲係好朋友,佢依家個女朋友我都識,我新書寫嘅稿,都有搵佢幫我做校對!」已有3、4年冇拍拖的她,原來曾受傷害:「曾經同個男仔有啲曖昧,對方似係又唔係,後來先知佢本身有女友,擺明係呃我,嗰時都好唔開心!」但對愛情她未感畏懼:「愛情係冇得驚,最緊要係大家夠愛對方!」

Winkie:最怕生o靚模

曾想過早婚的黎美言(Winkie),入行後心態轉變了,她解釋:「以前一拍拖就想結婚!媽咪19歲生我,所以我都以為自己會早結婚,未簽唱片公司前已經諗住結婚,當時問男友簽唔簽好?點知佢叫我簽約,嗰時覺得好灰,覺得佢唔想同我結婚!佢話難得我搵到一份有興趣嘅工,應該去試,之後大家就分開咗,再冇聯絡!」

以前對愛情抱專一態度的Winkie,如今對愛會有所懷疑:「幾年前爹哋媽咪出現摩擦,雖然佢哋冇分開,但對我始終有啲影響,對婚姻都抱懷疑態度!我甚至驚咗生BB,如果將來生個女出來,佢話要做模真係驚o架!依家有啲好細個,中學都未畢業,單靠身材做Model好似變咗質!」

Regen:神交好Sweet

HotCha中年紀最細的張惠雅(Regen),外表開朗Funny的她,原來最懷念初戀:「初戀發生喺中二,我哋係神交,唔會約出街,只係傾電話拍拖囉!諗起都Sweet、好純真!」已有5次戀愛經驗的她,覺得人愈大,感情生活反而愈不愉快,因為身邊有很多誘惑,男友變得花心:「我喺情人節發現男友一腳踏三船,嗰時真係好Hurt囉!」

被男友欺騙過,Regen對戀愛留下陰影,覺得很難再去開始一段戀情!她坦言會對男友疑神疑鬼,變成麻煩女友,時刻要男友報告行蹤:「我知呢啲係拍拖缺點,想改都改唔到!」她更不會揀圈中人做對象,因為藝人令她冇安全感:「好多朋友成日話我粗魯,又唔溫柔,我都驚冇男仔鍾意我o架!」

Click選心水港姐,請瀏覽on.cc東方互動《香港小姐2010》專輯

音樂組