寰宇新戲《索命童話》（前名《完美童話》）昨日在泰國開鏡及拜神，江若琳（Elanne）、劉青雲、萬綺雯、導演彭發及老闆林小明等均有出席；有關儀式十分大陣仗，除請來師傅誦經外，更擇吉時進行，未知是否與早前發生離奇集體入院事件有關。

James（左起）、Gary、傅嘉莉、江若琳、青雲、彭發、王寶強和萬綺雯，昨日一同出席新片開鏡拜神。

童心未泯的江若琳，對着豬頭留影。

早前曾「中招」的青雲略現倦容，他笑言因敏感底，故這次拍戲頗為辛苦：「我本身個鼻同眼都比較敏感，好彩我冇佢哋咁嚴重，但呢度啲陽光真係好曬，曬到連我咁嘅膚色都甩皮！最慘係喺工廠區拍夜景，好多塵，搞到連喉嚨都有事。」但青雲依然心情甚靚，問到太太郭藹明有否前來探班時，他即甜蜜地表示探了兩次，更大讚同片的泰國小演員厲害：「雖然我哋完全溝通唔到，但佢竟然每一句對白都接到，勁！」

穿上白色吊帶裙、長髮Look的Elanne透露，拍戲時因為過分投入嚇怕工作人員，她說：「我成套戲一句對白都冇，成日要狂喊、狂叫，試過情緒失控、幾乎虛脫，停咗機都仲好似癲咗咁繼續喊，啲人都忍唔住叫我冷靜啲。」

怪行嚇怕拍檔

談到如何投入角色，她透露要孤立自己、呆坐或者面壁，有時一呆更是五、六小時，情緒低落得令她回港拍劇時一度嚇怕拍檔：「謝天華話覺得我怪怪哋，不斷氹我開心，所以我同公司請咗半個月假去旅行放鬆。」

對於有份參演的電影《童眼》入圍威尼斯影展，Elanne感到十分興奮：「我已經諗緊Set咩頭着咩衫！」據知，《童》片的楊丞琳亦已度期出席影展。