為怕鄭嘉穎在戴思聰的喪禮出現，引起混亂及尷尬場面，治喪委員會覺得他不宜現身，嘉穎也表尊重，不會出席老師的喪禮。但昨日戴辛尉（葳葳）接受查小欣電話訪問，竟表示跟母親對治喪委員會的聲明全不知情，指聲明乃姊姊戴蘊慧（真真）所發：「媽咪最了解爹哋，無論爹哋生前有幾多委屈、冤枉、仇恨、不滿，發生乜事都好，爹哋都走咗，只希望爹哋喪禮可以寧靜地舉行，佢生前所有親戚、好友、學生，只要誠心，媽咪都歡迎。」

擔心媽媽身體

葳葳指姊姊對於父親突然去世感到傷心，情緒崩潰：「大家情緒不穩，仲要處理好多嘢，喺咁混亂嘅情況下，姊姊做咗急躁決定。爹哋有段時間好唔開心，佢辛苦身邊屋企人都辛苦，可能姊姊覺得不忿，想為爹哋出氣搵番個公道。」葳葳更透露在爹哋出事前，母親剛做完大手術，所以很擔心媽媽的身體狀況。

另一邊廂，真真對葳葳聲言對聲明不知情感愕然，她指是治喪委員會發出聲明，她也覺得安排妥當：「唔想是是非非影響爹哋喪禮，一心只想搞好喪禮，畀爹哋安心、平靜上路。」她強調並非拒絕嘉穎出現，也非針對一個人：「雖然我同嘉穎冇聯絡，但相信我同佢都有共識，佢係爹哋好錫嘅學生，相信佢會明白咁嘅安排，遲啲過咗，佢可以打畀我或葳葳，我哋可以安排佢去拜祭。」

昨日剛由新加坡返港的嘉穎，對師母歡迎他出席恩師喪禮，一臉肅穆的他無奈地說：「依家有啲混亂，如果佢家屬任何一個人覺得我唔適合出現，我都唔應該去，唔想為老師家人增添麻煩，唔想有更多炒作新聞，都希望老師一路好走。（遺憾？）唔係唔送，搵另一個適合時間先去。」

放大鏡戒指陪葬

據知，戴老師的陪葬品有近年睇報紙專用的放大鏡，以及常戴着的戒指，連日來兩名女兒為亡父走勻上水、屯門及沙田等安葬地視察。今日是戴老師的頭七，家人將為他準備拜祭儀式。